కప్పలన్నీ ఎక్కడికి వెళ్ళిపోయాయి?

కప్పలన్నీ ఎక్కడికి వెళ్ళిపోయాయి?

**

ఎక్కడో దూరాలనుంచి అర్థరాత్రి మూలుగులు వినిపిస్తున్నాయి.

పాడైపోతున్న మామిడి చెక్కతో చేసిన మంచం నుంచి కలుక్కు మనే శబ్దం వినిపిస్తున్నది!

ఆడ కప్ప కోసం మగ కప్ప వేసే కేకలు కూడా వినిపిస్తున్నాయి !

*

మంచి రోజులపై ఉన్న ఆశలన్నీ మనుషులలో మాయమైపోతున్నాయి!

నిరుద్యోగపు వెతుకులాటలో అలిసిపోయిన మనసూ, దేహం రెండూ ఖాళీ కడుపుతో ఉదయానందాన్ని అనుభవిస్తూ జడంగా పడి ఉన్నాయి.

*

ఓహ్!మంచం తన దేహాన్ని, అస్థిపంజరాన్నీ కోల్పోయింది!

కప్పలన్నీ చనిపోయాయి!

*

వర్షాలన్నీ పురుగుల మందులతో ఉన్న నురుగును మరింతగా

కుళ్ళబెడుతున్నాయి!

**

మహా నగరపు బస్తీలో ఇంకా చెమ్మ బారి శిథిలమైన గది తాళం వేయకుండానే తెరిచి ఉంది!

జమీలా శూన్యపు చూపులు నేలకి వాలిపోతూ ఉన్నాయి!

ఈ మధ్యకాలంలో ఆమె దగ్గరికి ఒక్క కస్టమర్ కూడా రావడం లేదు మరి.

**

అవునూ,ఇంతకీ కప్పలన్నీ ఎక్కడికి వెళ్ళిపోయాయి?

- ఇంగ్లీష్ మూలం మౌమితా ఆలం.

తెలుగు అనువాదం గీతాంజలి.