పాదయాత్రలతో ప్రజాపాలనను కదిలిద్దాం

దిశ, జవహార్‌నగర్ : జవహార్‌నగర్ డంపింగ్ యార్డ్ వల్ల పరిసర ప్రాంతాల ప్రజలు తీవ్ర ఇబ్బందులు ఎదుర్కొంటున్నారని, సమస్య పరిష్కారం కోసం పాదయాత్రలు, ప్రజా ఉద్యమాలను మరింత ఉధృతం చేయాలని డంపింగ్ యార్డ్ వ్యతిరేక పోరాట కమిటీ చైర్మన్ షేక్ షావలి పిలుపునిచ్చారు. సోమవారం కో-కన్వీనర్ మేక లలితాయాదవ్ ఆధ్వర్యంలో జవహార్‌నగర్ రాజీవ్‌గాంధీనగర్‌లో డంపింగ్ యార్డ్ వ్యతిరేక పోరాట కమిటీ ఆధ్వర్యంలో పాదయాత్ర నిర్వహించారు. డంపింగ్ యార్డ్‌ను వెంటనే తొలగించాలని డిమాండ్ చేస్తూ స్థానికులు, కమిటీ సభ్యులు నినాదాలు చేశారు. ఈ సందర్భంగా షేక్ షావలి మాట్లాడుతూ, డంపింగ్ యార్డ్ నుంచి వెలువడుతున్న దుర్వాసన, రసాయనాల ప్రభావంతో పరిసర ప్రాంతాల ప్రజలు ఆరోగ్య సమస్యలు ఎదుర్కొంటున్నారని ఆరోపించారు. చిన్నారుల ఎదుగుదల, మహిళల ఆరోగ్యంపై ప్రతికూల ప్రభావం పడుతోందని పేర్కొన్నారు. ప్రభుత్వం ఈ సమస్యను నిర్లక్ష్యం చేస్తే ఉద్యమాన్ని మరింత ఉధృతం చేస్తామని హెచ్చరించారు. రాంకీ యాజమాన్యం డంపింగ్ యార్డ్‌ను తొలగించే వరకు పోరాటం కొనసాగిస్తామని ప్రకటించారు. పాదయాత్రతో పాటు ఆటపాటల ద్వారా డంపింగ్ యార్డ్ సమస్యపై ప్రజలకు అవగాహన కల్పించారు. ఈ కార్యక్రమంలో ఆరుణ, సునీత, శివబాబు, స్వరూప, లక్ష్మీబాయి, సావిత్రి, వేణు, కాలేషా, డంపింగ్ యార్డ్ పరిసర ప్రాంతాల కాలనీవాసులు పాల్గొన్నారు.