గుజరాత్ వర్సిటీలో మోడీపై పాఠం

దిశ, వెబ్ డెస్క్ : గుజరాత్‌లోని వడోదరలో ఉన్న ప్రఖ్యాత మహారాజా సాయాజీరావు యూనివర్సిటీ (MSU), సోషియాలజీ విభాగంలో విప్లవాత్మక "మోదీత్వం" (Modi Tattva) అనే సరికొత్త మాడ్యూల్‌ను ప్రవేశపెట్టింది. 2026 జూన్ విద్యా సంవత్సరం నుండి అమలులోకి రానున్న ఈ కోర్సును, "సోషియాలజీ ఆఫ్ పేట్రియాటిజం" అనే పేపర్‌లో అంతర్భాగంగా చేర్చారు. ముఖ్యంగా బి.ఎ (BA) నాలుగో సంవత్సరం, ఎం.ఎ (MA) మొదటి సంవత్సరం చదువుతున్న విద్యార్థుల కోసం నాలుగు క్రెడిట్ల కోర్సుగా దీనిని రూపొందించారు. ఈ మాడ్యూల్ ద్వారా విద్యార్థులు ప్రధాని నరేంద్ర మోడీ నాయకత్వ శైలిని కేవలం రాజకీయ కోణంలోనే కాకుండా, సామాజిక శాస్త్ర దృక్పథంతో అధ్యయనం చేసే అవకాశం కలుగుతుంది. ఈ కోర్సు కేవలం సిద్ధాంతాలకే పరిమితం కాకుండా, మోడీ ప్రభుత్వ హయాంలో అమలు చేసిన డిజిటల్ ఇండియా వంటి కీలక పథకాలు, వాటి పట్ల ప్రజల్లో ఉన్న అభిప్రాయాలు, మరియు వరుస ఎన్నికల విజయాల వెనుక ఉన్న సామాజిక సమీకరణాలను లోతుగా విశ్లేషిస్తుంది. "మోదీత్వం"తో పాటు "సోషియాలజీ ఆఫ్ భారత్", "హిందూ సోషియాలజీ" వంటి ఇతర కొత్త మాడ్యూళ్లను కూడా సిలబస్‌లో చేర్చారు.