ఇన్నేళ్లయినా 'ఆర్ఆర్ఆర్' రికార్డు పదిలం.. నెక్స్ట్ ప్లేస్‌లో 'ధురందర్'

దిశ, వెబ్ డెస్క్: సినీ పరిశ్రమలో కొన్ని చిత్రాలు విడుదలై అద్భుతమైన రికార్డులను సృష్టిస్తుంటాయి. కాలక్రమేణా వాటిలో కొన్ని రికార్డులు ఇతర సినిమాల పేరిట నమోదవుతుంటే, మరికొన్ని మాత్రం ఎన్నేళ్లు గడిచినా చెక్కుచెదరకుండా నిలిచి ఉంటాయి. అలాంటి అరుదైన రికార్డుల్లో ఆర్ఆర్ఆర్ సినిమా పేరట కూడా ఓ రికార్డ్ ఉంది. 2022లో విడుదలైన ఈ చిత్రం ప్రపంచవ్యాప్తంగా దాదాపు రూ.1,300 కోట్లకు పైగా వసూళ్లు సాధించి ఘన విజయాన్ని అందుకుంది. అనంతరం నెట్‌ఫ్లిక్స్‌లో స్ట్రీమింగ్‌కు వచ్చిన ఈ సినిమాకు ప్రపంచవ్యాప్తంగా విశేష ఆదరణ లభించింది.

దీంతో 46.2 మిలియన్ వ్యూస్‌తో నెట్‌ఫ్లిక్స్‌లో అత్యధికంగా వీక్షించబడిన భారతీయ చిత్రంగా ఆర్ఆర్ఆర్ తొలి స్థానంలో నిలిచింది. ఆ తర్వాత ఎన్నో భారతీయ సినిమాలు నెట్‌ఫ్లిక్స్‌లో విడుదలైనప్పటికీ, ఇప్పటివరకు ఏ చిత్రం కూడా ఆర్ఆర్ఆర్ రికార్డును అధిగమించలేకపోయింది. ఇటీవల ధురందర్ సినిమా నెట్‌ఫ్లిక్స్‌లో స్ట్రీమింగ్‌కు వచ్చిన తర్వాత ఈ రికార్డును బద్దలు కొట్టే అవకాశాలు కనిపించాయి. అయితే ప్రస్తుతం ఆ చిత్రం 38.6 మిలియన్ వ్యూస్ మాత్రమే సాధించి, ఆర్ఆర్ఆర్ తర్వాత రెండో స్థానంలో కొనసాగుతోంది.