కళ్లముందే ఎండిపోతున్న ఖరీఫ్ పంటలు.. వరుణ దేవా కరుణించవా!

దిశ,తలకొండపల్లి: రంగారెడ్డి జిల్లా తలకొండపల్లి మండలంలోని 32 గ్రామపంచాయతీల పరిధిలో అన్నదాత గుండెల్లో ఆందోళన రోజురోజుకూ పెరుగుతోంది. జూన్ నెలలో కురిసిన తొలి జల్లులను నమ్ముకుని లక్షల రూపాయలు అప్పులు చేసి ఖరీఫ్ సాగు ప్రారంభించిన రైతులకు వరుణుడు మొండిచేయి చూపడంతో పంటలు కళ్లముందే ఎండిపోతున్నాయి. గతేడాది ఇదే సమయానికి మండలమంతా పచ్చని పైర్లతో కళకళలాడగా, ఈసారి ఎక్కడ చూసినా బీటలు వారిన నేలలు, వాడిపోయిన మొక్కలే కనిపిస్తున్నాయి. గతేడాది మండలంలో సుమారు 40 వేల ఎకరాలకు పైగా వివిధ పంటలు సాగు కాగా, ఈసారి రైతుల ఆశలు వర్షాభావంతో బూడిదలో పోసిన పన్నీరుగా మారిపోయాయి.

తొలకరి ఆశ.. కన్నీటి గాథగా మారింది..

రెండు మూడు జల్లులు కురవడంతో రైతులు వరి, మొక్కజొన్న, పత్తి, కందులు, వేరుశనగ తదితర పంటలను ఉత్సాహంగా సాగు చేశారు. కానీ ఆ తర్వాత ఆకాశం మేఘాలను దాచేసింది. నేలలో తేమ పూర్తిగా తగ్గిపోవడంతో మొక్కలు పసుపు రంగులోకి మారి ఎండుముఖం పడుతున్నాయి. రోజులు గడిచేకొద్దీ పంటను కాపాడుకోవాలనే ఆశ కూడా రైతుల్లో సన్నగిల్లుతోంది.

అప్పులు చేసి సాగు.. ఇప్పుడు దిక్కుతోచని స్థితి

ఎకరాకు రూ.15 వేల నుంచి రూ.20 వేల వరకు ఖర్చు చేసి రైతులు విత్తనాలు, ఎరువులు, పురుగుమందులు కొనుగోలు చేశారు. బ్యాంకులతో పాటు ప్రైవేట్ వడ్డీ వ్యాపారుల వద్ద అప్పులు చేసి సాగు ప్రారంభించారు. ఇప్పుడు వర్షాలు లేక పెట్టుబడి మొత్తం నేలలో కలిసిపోతుండటంతో అప్పులు ఎలా తీర్చాలనే ఆందోళన రైతులను వెంటాడుతోంది.

బీటలు వారుతున్న భూమి వాడిపోతున్న జీవనాధారం

వర్షాల లేమితో వ్యవసాయ భూములు బీటలు వారుతున్నాయి. బోరు బావుల్లో నీటి మట్టం రోజురోజుకూ తగ్గిపోతోంది. ఉన్న కొద్దిపాటి నీరు కూడా సాగుకు సరిపోక రైతులు నిస్సహాయంగా తమ పంటలు ఎండిపోతుండడాన్ని చూస్తూ ఉండిపోతున్నారు.

ఇంకో 10–20 రోజులు వర్షం లేకుంటే... పచ్చదనం కనుమరుగే

ఇంకా పది నుంచి ఇరవై రోజుల వరకు ఇదే పరిస్థితి కొనసాగితే మండలంలో ప్రస్తుతం కనిపిస్తున్న కొద్దిపాటి పచ్చదనం కూడా పూర్తిగా కనుమరుగయ్యే ప్రమాదం ఉందని రైతులు ఆందోళన వ్యక్తం చేస్తున్నారు. అప్పులు చేసి సాగు చేసిన పంటలు పూర్తిగా నష్టపోతే కుటుంబాల జీవనోపాధి సంక్షోభంలో పడుతుందని వాపోతున్నారు.

ఒకప్పుడు పచ్చని పొలాలు... నేడు ఎండిన నేలలు

జూన్, జూలై నెలల్లో పచ్చని పైర్లతో కళకళలాడే తలకొండపల్లి మండలం ఇప్పుడు వెలవెలబోతోంది. ఉమ్మడి పాలమూరు ప్రాంతానికి ఆనుకుని ఉన్న ఈ ప్రాంతంలో వ్యవసాయం పూర్తిగా వర్షాధారమే. సాగునీటి వసతులు పరిమితంగా ఉండటంతో వరుణుడి కరుణే రైతులకు ఆధారం. ఆ కరుణ లేకపోవడంతో అన్నదాతల ఆశలు ఒక్కొక్కటిగా కరిగిపోతున్నాయి.

గత కరువును గుర్తు చేస్తున్న దృశ్యాలు

ఉమ్మడి ఆంధ్రప్రదేశ్‌లో ఒకప్పుడు తీవ్ర కరువు పరిస్థితులు నెలకొన్న రోజులను తలపించేలా ప్రస్తుతం పరిస్థితులు మారుతున్నాయని రైతులు చెబుతున్నారు. ఇప్పటికైనా విస్తారంగా వర్షాలు కురవకపోతే ఈ ఏడాది ఖరీఫ్ సీజన్ పూర్తిగా దెబ్బతింటుందనే ఆందోళన వ్యక్తమవుతోంది. తొలకరిని చూసి అప్పు తెచ్చాం... ఇప్పుడు భవిష్యత్తే కనిపించడం లేదు. తొలి వర్షాలు పడగానే అప్పులు చేసి విత్తనాలు చల్లాం. ఇప్పుడు పంట ఎండిపోతోంది. తీసుకున్న అప్పులు ఎలా తీర్చాలో అర్థం కావడం లేదు. ప్రభుత్వం వెంటనే రైతులను ఆదుకోవాలి" అని పలువురు రైతులు ఆవేదన వ్యక్తం చేస్తున్నారు.

ప్రభుత్వమే ఆదుకోవాలి

వర్షాభావాన్ని దృష్టిలో ఉంచుకుని తలకొండపల్లి మండలాన్ని ప్రత్యేకంగా గుర్తించి ఇన్‌పుట్ సబ్సిడీ, పంట నష్టపరిహారం, రుణాల రీషెడ్యూల్, వడ్డీ మినహాయింపు వంటి ఉపశమన చర్యలను వెంటనే ప్రకటించాలని రైతులు, రైతు సంఘాలు ప్రభుత్వాన్ని కోరుతున్నాయి.