భారత్-అమెరికా వాణిజ్య ఒప్పందంలో కీలక మార్పులు

దిశ, వెబ్ డెస్క్: భారత్- అమెరికా దేశాల మధ్య కుదిరిన చారిత్రాత్మక మధ్యంతర వాణిజ్య ఒప్పందం లో కీలక పరిణామం చోటు చేసుకుంది. ఈ ఒప్పందానికి సంబంధించి శ్వేతసౌధం విడుదల చేసిన 'ఫ్యాక్ట్ షీట్' (Fact Sheet) లో అనూహ్య మార్పులు చోటుచేసుకున్నాయి. తొలుత విడుదల చేసిన నివేదికలో భారత్ అమెరికాకు చెందిన 'పప్పుధాన్యాలపై' (Certain Pulses) పన్నులు తగ్గించనుందని పేర్కొన్న అమెరికా, తాజాగా సవరించిన నివేదికలో ఆ పదాన్ని పూర్తిగా తొలగించింది. కాగా భారత వ్యవసాయ రంగంపై ప్రభావం చూపే ఈ అంశాన్ని ఒప్పందంలో భాగంగా భారత్ అంగీకరించలేదని, అందుకే శ్వేతసౌధం ఈ సవరణ చేయాల్సి వచ్చిందని నిపుణులు భావిస్తున్నారు.

వాణిజ్య లక్ష్యాల విషయంలో కూడా శ్వేతసౌధం తన పదజాలాన్ని మార్చుకుంది. అమెరికా నుంచి సుమారు 500 బిలియన్ డాలర్ల విలువైన వస్తువులను కొనుగోలు చేయడానికి భారత్ 'కట్టుబడి ఉంది' (Committed) అని మొదట పేర్కొన్న శ్వేతసౌధం, ఇప్పుడు దానిని భారత్ 'ఉద్దేశిస్తోంది' (Intends) అని మార్చింది. దీనివల్ల ఈ కొనుగోళ్లు ఒక తప్పనిసరి ఒప్పందం కాదని, కేవలం భవిష్యత్తు వాణిజ్య అంచనాలు మాత్రమేనని స్పష్టమవుతోంది. ఈ మార్పు ద్వారా భారత్ తన సార్వభౌమత్వాన్ని, వాణిజ్య వెసులుబాటును కాపాడుకోగలిగిందని విశ్లేషకులు అంచనా వేస్తున్నారు.

మరో ముఖ్యమైన మార్పు

ఈ డీల్‌లో మారో మారు.. డిజిటల్ సేవల పన్ను (Digital Services Tax) విషయంలో జరిగింది. భారత్ తన డిజిటల్ పన్నును తొలగిస్తుందని అమెరికా తొలుత ప్రకటించినప్పటికీ, తాజా నివేదికలో ఆ వాక్యాన్ని తొలగించి, కేవలం డిజిటల్ వాణిజ్య నిబంధనలపై చర్చలు జరపడానికి రెండు దేశాలు అంగీకరించాయని మాత్రమే పేర్కొంది. అలాగే, భారత్ కొనుగోలు చేయాల్సిన వస్తువుల జాబితా నుంచి 'వ్యవసాయ ఉత్పత్తులు' అనే పదాన్ని తొలగించి, కేవలం ఇంధనం (Energy), కమ్యూనికేషన్ టెక్నాలజీ, బొగ్గు వంటి రంగాలకు మాత్రమే పరిమితం చేశారు.

ఈ సవరణలు భారత వాణిజ్య వ్యూహానికి (India's Trade Strategy) దక్కిన విజయంగా విశ్లేషకులు అభిప్రాయపడుతున్నారు. దేశీయ రైతులకు, ఐటీ రంగ ప్రయోజనాలకు విఘాతం కలగకుండా భారత్ తన అభ్యంతరాలను గట్టిగా వినిపించడంతోనే శ్వేతసౌధం ఈ మార్పులు చేసినట్లు తెలుస్తోంది. ఇరు దేశాల మధ్య పరస్పర ప్రయోజనాల ప్రాతిపదికన ఈ ఒప్పందం కొనసాగుతుందని, రాబోయే రోజుల్లో మరిన్ని చర్చల ద్వారా పూర్తి స్థాయి వాణిజ్య ఒప్పందానికి (Full Trade Deal) మార్గం సుగమం అవుతుందని అధికారులు అంచనా వేస్తున్నారు.