భారత మామిడిపండ్లపై జపాన్ నిషేధం

దిశ, వెబ్ డెస్క్ : భారత మామిడిపండ్లపై జపాన్ తాత్కాలిక నిషేధం విధించడం కలకలం రేపింది. భారతదేశానికి చెందిన అత్యంత ఆదరణ పొందిన మామిడి పండ్ల ఎగుమతులపై జపాన్ ప్రభుత్వం హఠాత్తుగా విధించిన ఈ నిషేధం దేశీయ వ్యవసాయ వాణిజ్య రంగానికి భారీ ఎదురుదెబ్బగా మారింది. గడిచిన 20 సంవత్సరాలలో జపాన్ ఇలా భారత మామిడి పండ్లపై నిషేధం విధించడం ఇదే మొదటిసారి కావడం గమనార్హం. అయితే ప్రస్తుత సీజన్‌లో నాణ్యతా ప్రమాణాల విషయంలో తలెత్తిన కొన్ని సాంకేతిక లోపాల కారణంగా జపాన్ వ్యవసాయ, అటవీ, మత్స్య మంత్రిత్వ శాఖ (MAFF) ఈ కఠినమైన నిర్ణయాన్ని తీసుకుంది. ఈ నిషేధం కారణంగా అంతర్జాతీయంగా ఎంతో గుర్తింపు పొందిన భారతదేశపు ప్రీమియం మామిడి రకాలైన అల్ఫోన్సో (Alphonso), కేసర్ (Kesar), లంగ్డా (Langra), ముఖ్యంగా తెలుగు రాష్ట్రాల నుండి ఎగుమతి అయ్యే బంగినపల్లి (Banganapalli) రకాల రవాణా జపాన్ మార్కెట్‌కు పూర్తిగా నిలిచిపోయింది.

ఈ నిషేధానికి దారితీసిన ప్రధాన కారణాలను పరిశీలిస్తే.. జపాన్ ప్లాంట్ క్వారంటైన్ అధికారులు భారతదేశంలోని కొన్ని ప్రముఖ మామిడి ప్రాసెసింగ్, ప్యాకింగ్ కేంద్రాలలో నియమాలను సరిగ్గా పాటించడం లేదని గుర్తించారు. మామిడి పండ్ల ద్వారా 'ఫ్రూట్ ఫ్లైస్' అంటే పండ్లకు పట్టే ప్రమాదకరమైన కీటకాలు తమ దేశంలోకి ప్రవేశించి స్థానిక వ్యవసాయాన్ని, తోటలను దెబ్బతీసే అవకాశం ఉందని జపాన్ తీవ్ర ఆందోళన వ్యక్తం చేసింది. కీటకాల నియంత్రణ కోసం చేసే ఫ్యూమిగేషన్, డిసిన్ఫెక్షన్ విధానాలు అంతర్జాతీయ ప్రమాణాలకు అనుగుణంగా లేవని తేలడంతో, జపాన్ అధికారులు యోకోహామా ప్లాంట్ ప్రొటెక్షన్ అసోసియేషన్ ద్వారా మార్చి 25 లేదా ఆ తర్వాత భారతదేశంలో జారీ చేసిన ఏ ఒక్క ఇన్‌స్పెక్షన్ సర్టిఫికేట్‌ను కూడా ఆమోదించబోమని, భారతీయ మామిడి షిప్‌మెంట్‌లను తమ దేశంలోకి అనుమతించేది లేదని స్పష్టం చేశారు.

దేశీయంగా మహారాష్ట్ర, గుజరాత్, ఏపీ వంటి ప్రధాన రాష్ట్రాలలో మామిడి హార్వెస్టింగ్ పీక్ స్టేజ్‌లో ఉన్న తరుణంలో ఈ నిర్ణయం రావడంతో ఎగుమతిదారులు ఊహించని ఆర్థిక నష్టాలను చవిచూడాల్సి వస్తోంది. జపాన్ మార్కెట్ కోసం ప్రత్యేకంగా ప్యాక్ చేసి, లాజిస్టిక్స్ , కోల్డ్ స్టోరేజ్ సౌకర్యాలను సిద్ధం చేసుకున్న వ్యాపారులు ఇప్పుడు ప్రత్యామ్నాయ మార్గాలను వెతుక్కునే పరిస్థితి ఏర్పడింది. ప్రస్తుతం భారత ప్రభుత్వ ఆధ్వర్యంలోని అగ్రికల్చరల్ అండ్ ప్రాసెస్డ్ ఫుడ్ ప్రొడక్ట్స్ ఎక్స్‌పోర్ట్ డెవలప్‌మెంట్ అథారిటీ(APEDA), కేంద్ర ప్లాంట్ క్వారంటైన్ విభాగాలు ఈ సంక్షోభాన్ని పరిష్కరించడానికి జపాన్ ఉన్నతాధికారులతో దౌత్యపరమైన సంప్రదింపులు జరుపుతున్నాయి. జపాన్ కోరిన విధంగా ప్యాకింగ్ కేంద్రాల వద్ద లోపాలను సరిదిద్ది, కఠినమైన నిఘా, సరైన యాక్షన్ ప్లాన్‌ను సమర్పించిన తర్వాతే ఈ నిషేధం తొలగిపోయే అవకాశం ఉంది.