పశ్చిమ ఆసియా సంక్షోభంపై ఇజ్రాయెల్‌ విదేశాంగ మంత్రితో జైశంకర్ చర్చలు

దిశ, వెబ్ డెస్క్: పశ్చిమ ఆసియాలో యుద్ధ మేఘాలు కమ్ముకున్న వేళ భారత విదేశాంగ మంత్రి ఎస్. జైశంకర్ (Indian External Affairs Minister S. Jaishankar) దౌత్యపరమైన చర్చలను ముమ్మరం చేశారు. ఇజ్రాయెల్ కొత్త విదేశాంగ మంత్రిగా బాధ్యతలు చేపట్టిన గిడియాన్ సార్‌ (Sir Gideon)కు ఫోన్ ద్వారా అభినందనలు తెలపడంతో పాటు, ప్రాంతీయ భద్రత (Regional security)పై లోతైన చర్చలు జరిపారు. హర్మూజ్ జలసంధిలో పెరుగుతున్న ఉద్రిక్తతలు, ఇరాన్-ఇజ్రాయెల్ మధ్య నెలకొన్న అనిశ్చితిపై ఇరు నేతలు తమ అభిప్రాయాలను పంచుకున్నారు.

పశ్చిమ ఆసియాలో శాంతిని నెలకొల్పడం ప్రస్తుతం అత్యంత ఆవశ్యకమని జైశంకర్ స్పష్టం చేశారు. యుద్ధం మరింత విస్తరించకుండా ఉండటానికి దౌత్యపరమైన పరిష్కారాలే మార్గమని ఆయన సూచించారు. ఆ ప్రాంతంలో ఉన్న భారతీయ పౌరుల భద్రత మరియు వాణిజ్య నౌకల రాకపోకలకు ఆటంకం కలగకుండా చూడటంపై భారత్ తన ఆందోళనను వ్యక్తం చేసింది. ఇజ్రాయెల్ మరియు భారత్ మధ్య ఉన్న వ్యూహాత్మక భాగస్వామ్యాన్ని మరింత ముందుకు తీసుకెళ్లడంపై ఇరు మంత్రులు ఏకాభిప్రాయానికి వచ్చారు.

ఈ చర్చల అనంతరం జైశంకర్ తన 'X' (గతంలో ట్విట్టర్) ఖాతాలో స్పందిస్తూ.. "ఇజ్రాయెల్ విదేశాంగ మంత్రి గిడియాన్ సార్‌తో మాట్లాడటం సంతోషంగా ఉంది. పశ్చిమ ఆసియా సంక్షోభంలోని వివిధ కోణాలపై మేము చర్చించాము. ఆ ప్రాంతంలో సుస్థిరత కోసం నిరంతరం సంప్రదింపులు జరపాలని నిర్ణయించుకున్నాము" అని పేర్కొన్నారు.