యూఏఈపై ఇరాన్ దాడులు.. ఓ భారతీయునికి గాయాలు

దిశ, వెబ్ డెస్క్ : మధ్యప్రాచ్యంలో యుద్ధ సెగలు ఇప్పుడు గల్ఫ్ దేశాలకు పూర్తిస్థాయిలో అంటుకున్నాయి. అమెరికా జరిపిన దాడులకు ప్రతీకారంగా ఇరాన్ తన మిసైల్స్ తో యూఏఈ లక్ష్యంగా భారీ విధ్వంసానికి పూనుకుంది. ఇరాన్ ఏకకాలంలో 165 బాలిస్టిక్ మిసైళ్లు, 541 ఆత్మాహుతి డ్రోన్లను ప్రయోగించి ఎమిరేట్స్‌పై విరుచుకుపడింది. UAE రక్షణ మంత్రిత్వ శాఖ వెల్లడించిన సమాచారం ప్రకారం.. ఈ దాడుల వల్ల ముగ్గురు వ్యక్తులు ప్రాణాలు కోల్పోగా, 58 మంది తీవ్రంగా గాయపడ్డారు. మృతులలో పాకిస్తాన్, నేపాల్, బంగ్లాదేశ్ దేశాలకు చెందిన వారు ఉండగా, గాయపడిన వారిలో ఒక భారతీయుడు కూడా ఉన్నట్లు అధికారికంగా ధృవీకరించారు. ఈ పరిణామం గల్ఫ్ దేశాల్లో నివసిస్తున్న లక్షలాది మంది ప్రవాస భారతీయులను మరియు వారి కుటుంబాలను తీవ్ర భయాందోళనలకు గురిచేస్తోంది.

UAE వాయుసేన తన అత్యాధునిక రక్షణ వ్యవస్థలను ఉపయోగించి అత్యధిక శాతం క్షిపణులను గాలిలోనే అడ్డుకోగలిగినప్పటికీ, కొన్ని క్షిపణి శకలాలు జనసమ్మర్థం ఉన్న ప్రాంతాల్లో పడటం వల్ల భారీ నష్టం వాటిల్లింది. ముఖ్యంగా షార్జాలోని అతిపెద్ద షాపింగ్ మాల్‌పై డ్రోన్ శకలాలు పడటంతో భారీ ఎత్తున మంటలు చెలరేగాయి. ఆ సమయంలో మాల్ లోపల వందలాది మంది ప్రజలు ఉన్నారని, వారిని సురక్షితంగా బయటకు తీసుకురావడానికి రెస్క్యూ టీమ్స్ తీవ్రంగా శ్రమిస్తున్నాయని వార్తలు అందుతున్నాయి. ఈ దాడి కారణంగా ఎమిరేట్స్‌లోని పలు ప్రాంతాల్లో దట్టమైన పొగ కమ్ముకుంది.

ఈ దాడులు అంతర్జాతీయంగా తీవ్ర కలకలం రేపుతున్నాయి. ఇప్పటివరకు యుద్ధానికి దూరంగా ఉన్న దేశాలపై కూడా ఇరాన్ దాడులు చేయడం చూస్తుంటే, మధ్యప్రాచ్యంలో పరిస్థితి చేయి దాటిపోయిందని స్పష్టమవుతోంది. ముఖ్యంగా భారతీయులు అధికంగా ఉండే UAE వంటి దేశాలపై దాడులు జరగడం వల్ల భారత ప్రభుత్వం అత్యంత అప్రమత్తమైంది. గాయపడిన భారతీయుడికి మెరుగైన వైద్యం అందించాలని, అలాగే అక్కడ నివసిస్తున్న భారతీయుల రక్షణ కోసం ప్రత్యేక భద్రతా ఏర్పాట్లు చేయాలని కేంద్రం యోచిస్తోంది. ఈ క్షిపణి దాడుల పరంపర గనుక ఇలాగే కొనసాగితే, గల్ఫ్ దేశాల ఆర్థిక వ్యవస్థ దెబ్బతినడమే కాకుండా ప్రపంచవ్యాప్తంగా చమురు సంక్షోభం మరింత ముదిరే ప్రమాదం ఉంది.

గల్ఫ్ సంక్షోభంపై కేబినెట్ కమిటీ ఆన్ సెక్యూరిటీ భేటీ.. భారతీయుల తరలింపు పై కసరత్తు!