పెర్త్ టెస్టులో ఆస్ట్రేలియా చేతిలో భారత మహిళల జట్టు ఓటమి

దిశ, వెబ్ డెస్క్: భారత జట్టు ఆస్ట్రేలియా టూర్‌లో భాగంగా జరిగిన ఏకైక టెస్టులో ఘోర ఓటమి చవిచూసింది. ఈ టెస్టు మ్యాచ్‌లో భారత్ 10 వికెట్ల తేడాతో ఘోర పరాజయాన్ని మూటగట్టుకుంది. రెండు ఇన్నింగ్స్‌లలోనూ బ్యాటింగ్‌లో వైఫల్యం భారత జట్టుపై తీవ్ర ప్రభావం చూపింది. మొదటి ఇన్నింగ్స్‌లో 198 పరుగులు, రెండో ఇన్నింగ్స్‌లో కేవలం 149 పరుగులు మాత్రమే చేయగలిగింది. మరోవైపు, ఆస్ట్రేలియా తన మొదటి ఇన్నింగ్స్‌లో 323 పరుగులు చేసి భారీ ఆధిక్యాన్ని సాధించింది. లక్ష్య ఛేదనలో ఆస్ట్రేలియా (Australia) ఏమాత్రం తడబడకుండా, రెండో ఇన్నింగ్స్‌లో వికెట్ నష్టపోకుండా 28 పరుగులు చేసి విజయాన్ని అందుకుంది.

భారత బ్యాటర్లలో అరంగేట్రం చేసిన ప్రతికా రావల్ రెండో ఇన్నింగ్స్‌లో ఒంటరి పోరాటం చేస్తూ తన ప్రతిభను చాటుకుంది. కానీ మిగిలిన ప్లేయర్ల నుంచి సరైన మద్దతు లభించలేదు. బౌలింగ్‌లో భారత్ అప్పుడప్పుడు ఆస్ట్రేలియాపై ఒత్తిడి తెచ్చినప్పటికీ, తక్కువ స్కోరు ఉండటంతో అది విజయాన్ని అందించలేకపోయింది. కాగా, ఈ మ్యాచ్ ఆస్ట్రేలియా స్టార్ ప్లేయర్ అలీసా హీలీకి ప్రత్యేకంగా నిలిచిపోయింది. అంతర్జాతీయ క్రికెట్ నుండి ఆమెకు ఇది ఘనమైన వీడ్కోలు మ్యాచ్‌గా మారింది. మ్యాచ్ ముగిసిన తర్వాత సహచర ఆటగాళ్లు ఆమెను భుజాలపై ఎత్తుకుని గౌరవ వందనం సమర్పించారు.