న్యాయ వాదులందరికీ ఆరోగ్య బీమా కల్పించాలి: అడ్వకేట్స్ అసోసియేషన్

దిశ, తెలంగాణ బ్యూరో : రాష్ట్రవ్యాప్తంగా హైకోర్టుతో పాటు వివిధ జిల్లా కోర్టుల్లో ప్రాక్టీస్ చేస్తున్న న్యాయవాదులందరికీ ఆరోగ్య బీమా పథకాన్ని వర్తింపజేయాలని తెలంగాణ హైకోర్టు అడ్వకేట్స్ అసోసియేషన్ రాష్ట్ర ప్రభుత్వాన్ని కోరింది. న్యాయవాద వృత్తిలోకి కొత్తగా అడుగుపెడుతున్న యువ, జూనియర్ అడ్వకేట్లకు అండగా నిలిచేందుకు ప్రత్యేకంగా స్టైఫండ్ సదుపాయాన్ని సైతం ప్రవేశపెట్టాలని విజ్ఞప్తి చేసింది. ఈ మేరకు కొత్తగా ఎన్నికైన తెలంగాణ హైకోర్టు న్యాయవాదుల సంఘం ప్రతినిధుల బృందం ఆదివారం రాష్ట్ర న్యాయశాఖ కార్యదర్శి పాపిరెడ్డిని కలిసి ఓ వినతిపత్రం సమర్పించింది. న్యాయవాదుల సంక్షేమం పట్ల ప్రభుత్వం సానుకూల దృక్పథంతో వ్యవహరించాలని ఈ సందర్భంగా అసోసియేషన్ నాయకులు కోరారు.

ప్రస్తుతం అమల్లో ఉన్న ఆరోగ్య బీమా పథకం అందరికీ దరిచేరడం లేదని నాయకులు ప్రభుత్వ దృష్టికి తీసుకెళ్లారు. ముఖ్యంగా 2019 సంవత్సరం తర్వాత న్యాయవాద వృత్తిలో చేరిన వారు ఈ బీమా పథకం పరిధిలోకి రావడం లేదని, ఈ నిబంధనను వెంటనే సవరించాలని వారు విన్నవించారు. పాత, కొత్త అన్న వ్యత్యాసం లేకుండా రాష్ట్రంలో ప్రాక్టీస్ చేస్తున్న ప్రతి ఒక్క న్యాయవాదికి హెల్త్ ఇన్సూరెన్స్ ప్రయోజనాలు అందేలా తక్షణమే చర్యలు తీసుకోవాలని న్యాయ కార్యదర్శికి స్పష్టం చేశారు. విధి నిర్వహణలో నిత్యం ఎంతో ఒత్తిడికి గురయ్యే న్యాయవాదులకు కనీస ఆరోగ్య భద్రత కల్పించడం ద్వారా వారి కుటుంబాలకు ప్రభుత్వం తరఫున భరోసా కల్పించినట్లు అవుతుందని పేర్కొన్నారు. దీనిపై ప్రభుత్వం ప్రత్యేక దృష్టి సారించి ఆరోగ్య భద్రత కల్పనలో నెలకొన్న అవరోధాలను తొలగించాలని డిమాండ్ చేశారు.

ఆరోగ్య బీమా తో పాటు యువ న్యాయవాదుల ఆర్థికాభివృద్ధికి తగిన చర్యలు తీసుకోవాలని ప్రతినిధి బృందం కోరింది. న్యాయవాద వృత్తిని ఎంచుకుని కోర్టుల్లో ప్రాక్టీస్ ప్రారంభిస్తున్న తొలి నాళ్లలో జూనియర్లు తీవ్ర ఆర్థిక ఇబ్బందులు ఎదుర్కొంటున్నారని, వారికి చేయూతనిచ్చేందుకు వీలుగా తగిన స్టైఫండ్ అందించాలని అసోసియేషన్ ప్రభుత్వాన్ని అభ్యర్థించింది. దీనికి తోడు తెలంగాణ హైకోర్టు అసోసియేషన్‌కు ప్రభుత్వం నుంచి మంజూరు కావాల్సిన పెండింగ్ గ్రాంట్లను కూడా వీలైనంత త్వరగా విడుదల చేయాలని కోరింది. తమ డిమాండ్ల పట్ల రాష్ట్ర ప్రభుత్వం సానుకూలంగా స్పందించి, న్యాయవాద వృత్తికి గౌరవం దక్కేలా సంక్షేమ నిర్ణయాలు తీసుకుంటుందని నాయకులు ఆశాభావం వ్యక్తం చేశారు. న్యాయశాఖ కార్యదర్శి పాపిరెడ్డికి వినతిపత్రం అందజేసిన వారిలో హైకోర్టు అడ్వకేట్స్ అసోసియేషన్ అధ్యక్షుడు ఎస్. సురేందర్ రెడ్డి, ఉపాధ్యక్షుడు డి.ఎల్. పాండు, కార్యదర్శులు పి. శ్రవణ్ కుమార్ గౌడ్, నిరంజన్ రెడ్డి తదితరులు పాల్గొన్నారు.