సచిన్ దంపతులతో కలిసి వింబుల్డన్ తిలకించిన గిల్.. ఫోటో వైరల్

దిశ, వెబ్ డెస్క్ : లండన్ వేదికగా సాగుతున్న ప్రతిష్టాత్మక వింబుల్డన్ 2026 టోర్నమెంట్‌లో ఒక ఆసక్తికరమైన దృశ్యం ఆవిష్కృతమైంది. టెన్నిస్ ప్రపంచంలోనే అత్యంత ప్రతిష్టాత్మకమైన జానిక్ సినర్, నోవాక్ జకోవిచ్ మధ్య జరిగిన పురుషుల సింగిల్స్ సెమీ-ఫైనల్ సమరాన్ని వీక్షించడానికి భారత క్రికెట్ దిగ్గజాలు లండన్ సెంటర్ కోర్టులోని 'రాయల్ బాక్స్' (Royal Box) లో ప్రత్యక్షమయ్యారు. క్రికెట్ దేవుడు సచిన్ టెండూల్కర్, ఆయన సతీమణి అంజలి టెండూల్కర్‌లతో కలిసి భారత యువ క్రికెట్ సంచలనం, కెప్టెన్ శుభ్‌మన్ గిల్ ఒకే ఫ్రేమ్‌లో కూర్చొని మ్యాచ్‌ను ఆస్వాదించడం క్రీడా వర్గాల్లో పెద్ద టాపిక్‌గా మారింది.

క్లాసిక్ లుక్‌లో మెరిసిపోతున్న గిల్, సచిన్ దంపతుల పక్కనే కూర్చున్న ఫోటోలు ఎక్స్(X), ఇన్‌స్టాగ్రామ్‌లలో పోస్ట్ చేసిన వెంటనే విపరీతంగా వైరల్ అవుతున్నాయి. వింబుల్డన్ రాయల్ బాక్స్‌లో కూర్చునే అరుదైన గౌరవం దక్కించుకున్న నాల్గవ భారతీయ కెప్టెన్‌గా గిల్ రికార్డు సృష్టించినప్పటికీ, సోషల్ మీడియా దృష్టి మాత్రం మరో టాపిక్ వైపు మళ్లింది.

సారా-గిల్ పెళ్లి వార్తల బజ్!

గత కొంతకాలంగా సచిన్ టెండూల్కర్ కుమార్తె సారా టెండూల్కర్, శుభ్‌మన్ గిల్ ఇద్దరూ ప్రేమలో ఉన్నారంటూ సోషల్ మీడియాలో, జాతీయ మీడియాలో పెద్ద ఎత్తున ప్రచారం సాగుతున్న సంగతి తెలిసిందే. ఎప్పుడూ ఈ ఇద్దరూ తమ బంధంపై అధికారికంగా స్పందించనప్పటికీ, ఇప్పుడు ఏకంగా సచిన్, అంజలి టెండూల్కర్‌లతో కలిసి గిల్ అంతర్జాతీయ వేదికపై రాయల్ బాక్స్ పంచుకోవడంతో ఆ వార్తలకు మరింత బలం చేకూరినట్లయింది. సచిన్ కుటుంబంతో గిల్ ఎంత క్లోజ్‌గా ఉంటున్నాడో చెప్పడానికి ఈ విజువల్స్ నిదర్శనమని నెటిజన్లు కామెంట్లు పెడుతున్నారు. అంతా సవ్యంగానే సాగితే.. త్వరలోనే ఈ స్టార్ క్రికెటర్, సారా టెండూల్కర్ల పెళ్లి కబురు కూడా అధికారికంగా బయటకు వచ్చే అవకాశం ఉందంటూ జాతీయ మీడియా సైతం కథనాలను వండివారుస్తోంది. బిజీ క్రికెట్ షెడ్యూల్ మధ్య లండన్‌లో లభించిన ఈ విరామంలో గిల్ ఇలా సచిన్ ఫ్యామిలీతో కనిపించడం అటు క్రికెట్ సర్కిల్స్‌లో, ఇటు బాలీవుడ్ లో హాట్ టాపిక్‌గా మారింది.