రాష్ట్రంలో వడగళ్ల వాన బీభత్సం.. ప్రకృతి ప్రకోపానికి ముగ్గురు మృతి

దిశ, వెబ్ డెస్క్: భారత వాతావరణ శాఖ హెచ్చిరించినట్లుగానే సిక్కిం రాష్ట్రంలో వడగళ్ల వాన బీభత్సం సృష్టించింది. రాష్ట్ర రాజధాని అయిన గాంగ్‌టక్, పరిసర ప్రాంతాల్లో ఆదివారం సాయంత్రం ప్రకృతి బీభత్సం సృష్టించింది. ఒక్కసారిగా మారిన వాతావరణం, ఉరుములు మెరుపులతో కూడిన భారీ వడగళ్ల వాన (Hailstorm) జనజీవనాన్ని అస్తవ్యస్తం చేసింది. ఈ ఈదురు గాలుల ధాటికి గాంగ్‌టక్‌లో ఒక మహిళ ప్రాణాలు కోల్పోగా, ప్యాక్యాంగ్ జిల్లాలో జరిగిన మరో ప్రమాదంలో ఇద్దరు మృతి చెందారు. దీంతో ఈ ప్రకృతి విపత్తులో మొత్తం మరణాల సంఖ్య మూడుకు చేరింది.

ప్యాక్యాంగ్ జిల్లాలోని చోటా సింగ్తాం వద్ద రాంగ్‌పో-గాంగ్‌టక్ జాతీయ రహదారిపై ప్రయాణిస్తున్న ఒక పర్యాటక వాహనంపై భారీ చెట్టు విరిగిపడింది. ఈ ప్రమాద సమయంలో వాహనంలో ఉన్న ఇద్దరు వ్యక్తులు అక్కడికక్కడే ప్రాణాలు కోల్పోగా, మరో ముగ్గురికి తీవ్ర గాయాలయ్యాయి. గాయపడిన వారిని వెంటనే సమీపంలోని మణిపాల్ ఆసుపత్రికి తరలించారు. అటు గాంగ్‌టక్ పట్టణంలో దట్టమైన వడగళ్ల వాన కారణంగా రహదారులన్నీ తెల్లటి పొరలా పేరుకుపోయాయి, దీనివల్ల వాహనాల రాకపోకలు గంటల తరబడి నిలిచిపోయాయి.

స్తంభించిన విద్యుత్.. హై అలర్ట్‌లో యంత్రాంగం

భారీ గాలుల ప్రభావంతో అనేక చోట్ల చెట్లు, విద్యుత్ స్తంభాలు నేలకొరిగాయి. దీనివల్ల గాంగ్‌టక్ మరియు ప్యాక్యాంగ్ ప్రాంతాల్లో విద్యుత్ సరఫరాకు తీవ్ర అంతరాయం ఏర్పడింది. వాతావరణ శాఖ (IMD) హెచ్చరికల ప్రకారం, రాబోయే 24 గంటల పాటు సిక్కిం మరియు ఈశాన్య రాష్ట్రాల్లో ఉరుములతో కూడిన భారీ వర్షాలు కురిసే అవకాశం ఉంది. పర్యాటకులు మరియు స్థానిక ప్రజలు అప్రమత్తంగా ఉండాలని, కొండచరియలు విరిగిపడే ప్రమాదం ఉన్న ప్రాంతాలకు వెళ్లవద్దని సిక్కిం ప్రభుత్వం హెచ్చరికలు జారీ చేసింది.