బెంగాల్ ఎన్నికల్లో భారీ విజయం సాధించిన భారత మాజీ క్రికెటర్ అశోక్ డిండా

దిశ, వెబ్ డెస్క్: పశ్చిమ బెంగాల్ అసెంబ్లీ ఎన్నికల్లో భారత మాజీ ఫాస్ట్ బౌలర్ అశోక్ డిండా (Ashok Dinda) అద్భుత విజయాన్ని అందుకున్నారు. తూర్పు మేదినీపూర్ జిల్లాలోని మోయినా (Moyna) నియోజకవర్గం నుండి భారతీయ జనతా పార్టీ (BJP) అభ్యర్థిగా పోటీ చేసిన ఆయన, తన సమీప ప్రత్యర్థి, తృణమూల్ కాంగ్రెస్ (TMC) అభ్యర్థి చందన్ మొండల్‌పై భారీ మెజారిటీతో గెలుపొందారు. ఈ ఎన్నికల్లో డిండాకు మొత్తం 1,27,166 ఓట్లు లభించగా, చందన్ మొండల్‌కు 1,10,925 ఓట్లు వచ్చాయి. తద్వారా ఆయన సుమారు 16,241 ఓట్ల మెజారిటీతో ఘన విజయం సాధించి తన స్థానాన్ని నిలబెట్టుకున్నారు.

గతంలో 2021 ఎన్నికల్లో కేవలం 1,260 ఓట్ల స్వల్ప మెజారిటీతో గెలిచిన డిండా, ఈసారి ఆ ఆధిక్యాన్ని గణనీయంగా పెంచుకోవడం విశేషం. టీమిండియా తరపున ఆడి తనకంటూ ఒక గుర్తింపు తెచ్చుకున్న ఆయన, రాజకీయాల్లోనూ అదే తరహాలో రాణిస్తున్నారు. క్రికెట్ మైదానంలో తన వేగంతో ప్రత్యర్థులను కట్టడి చేసిన ఈ మాజీ పేసర్, ఇప్పుడు ఎన్నికల బరిలోనూ తనదైన ముద్ర వేశారు. పశ్చిమ బెంగాల్‌ వ్యాప్తంగా బీజేపీ చారిత్రాత్మక విజయం సాధించిన వేళ, డిండా విజయం ఆ పార్టీ శ్రేణుల్లో రెట్టింపు ఉత్సాహాన్ని నింపింది.