వరద కాలువ మరమ్మత్తు పనులను త్వరితగతిన పూర్తి చేయాలి

దిశ, మోర్తాడ్ : మోర్తాడ్ మండలంలోని గాండ్లపేట్ వద్ద ఉన్న వరద కాలువకు ఇటీవల గండి పడింది. మరమ్మత్తుల కోసం ప్రభుత్వం ఇటీవల నిధులు మంజూరు చేయగా, పనులు శరవేగంగా కొనసాగుతున్నాయి. గురువారం బాల్కొండ నియోజకవర్గ కాంగ్రెస్ పార్టీ ఇన్‌చార్జి ముత్యాల సునీల్ కుమార్ మరమ్మత్తు పనులను పరిశీలించి, వాటిని త్వరితగతిన పూర్తి చేయాలని అధికారులను కోరారు. రబీ సీజన్ ప్రారంభం కానున్న నేపథ్యంలో రైతులకు ఎలాంటి ఇబ్బందులు కలగకుండా చర్యలు తీసుకోవాలని ఆయన సూచించారు. ఈ కార్యక్రమంలో ఇరిగేషన్ శాఖ అధికారులు, కాంగ్రెస్ పార్టీ నాయకులు, కార్యకర్తలు పాల్గొన్నారు.