ఫౌజీ నటుడికి విషపు సాలీడు కాటు... క్లారిటీ ఇచ్చిన చిత్ర యూనిట్

దిశ, వెబ్ డెస్క్ : రెబల్ స్టార్ ప్రభాస్, దర్శకుడు హను రాఘవపూడి కాంబినేషన్‌లో తెరకెక్కుతున్న భారీ పీరియాడిక్ వార్ డ్రామా 'ఫౌజీ' (Fauzi) షూటింగ్ హైదరాబాద్‌లోని రామోజీ ఫిలిం సిటీలో శరవేగంగా జరుగుతోంది. అయితే ఈ సినిమా షూటింగ్ సెట్స్‌లో ఒక అనుకోని సంఘటన జరిగిందంటూ సామాజిక మాధ్యమాల్లో వస్తున్న కొన్ని వార్తలు ప్రస్తుతం నెట్టింట తీవ్ర వైరల్‌గా మారాయి. ఈ సినిమాలో కీలక పాత్ర పోషిస్తున్న ప్రముఖ బాలీవుడ్, బెంగాలీ నటుడు రాజేష్ శర్మ (Rajesh Sharma) కు షూటింగ్ సమయంలో ఒక ప్రమాదకరమైన విషపురుగు కుట్టిందని, ఆ కారణంగా ఆయన తీవ్ర అస్వస్థతకు గురై ఆసుపత్రిలో అత్యవసర విభాగంలో చికిత్స పొందుతున్నారంటూ నిన్నటి నుండి పెద్ద ఎత్తున ప్రచారం సాగింది.

పురుగు కుట్టిందనే ప్రచారం

సామాజిక మాధ్యమాల్లో వైరల్ అయిన కథనాల ప్రకారం.. షూటింగ్ ప్యాకప్ అయిన తర్వాత దట్టమైన చెట్లు ఉన్న ప్రాంతంలో రాజేష్ శర్మ స్థానిక టెక్నీషియన్లతో మాట్లాడుతుండగా ఆయన కాలిపై ఏదో పురుగు కుట్టింది. మొదట దానిని ఆయన సాధారణ కీటకమే అనుకుని పెద్దగా పట్టించుకోలేదు. కానీ, కొద్ది గంటల అనంతరం ఆయనకు కుడి కాలు తీవ్రంగా వాచిపోవడంతో పాటు శ్వాస తీసుకోవడం ఇబ్బందిగా మారి, హై ఫీవర్ వచ్చింది. దీంతో ఆయన హైదరాబాద్ నుంచి కోల్‌కతాకు ఫ్లైట్ జర్నీ చేస్తున్న సమయంలో మరింత అస్వస్థతకు లోనై, అక్కడ కోల్‌కతాలోని మణిపాల్ ఆసుపత్రిలో చేరారని, ఆయన కాలి ఇన్ఫెక్షన్ మోకాలి వరకు పాకిందని వార్తలు వచ్చాయి.

చిత్ర యూనిట్ క్లారిటీ

ఈ వ్యవహారంపై తీవ్ర ఆందోళన వ్యక్తమవడంతో 'ఫౌజీ' మూవీ యూనిట్, రాజేష్ శర్మ వ్యక్తిగత సిబ్బంది క్లారిటీ ఇచ్చారు. రాజేష్ శర్మను ఎలాంటి ప్రమాదకరమైన సాలీడు కుట్టలేదని మూవీ టీమ్ స్పష్టం చేసింది. నిజానికి రాజేష్ శర్మ గత కొంతకాలంగా తీవ్రమైన డయాబెటిస్ సమస్యతో బాధపడుతున్నారని, షూటింగ్ ముగించుకుని ఇంటికి వెళ్ళిన తర్వాత ఆయన శరీరంలో షుగర్ లెవెల్స్ (Sugar Levels) అకస్మాత్తుగా పెరగడం వల్లే అనారోగ్యానికి గురయ్యారని పేర్కొంది.

హైదరాబాద్ ప్రయాణంలోనే ఆయనకు ప్రాణాంతక పరిస్థితి ఏర్పడిందనే వార్తల్లో అస్సలు నిజం లేదని ఖండించింది. ప్రస్తుతం ఆయనకు వైద్యుల పర్యవేక్షణలో సాధారణ చికిత్స అందుతోందని, కేవలం ఒకటి లేదా రెండు రోజుల్లోనే ఆయన పూర్తి ఆరోగ్యంతో ఆసుపత్రి నుంచి డిశ్చార్జ్ కానున్నారని భరోసా ఇచ్చారు. అలాగే రాజేష్ శర్మ అసిస్టెంట్ కూడా సోషల్ మీడియా వేదికగా స్పందిస్తూ.. విషపురుగు కుట్టడం వల్లే ఆయన ఐసీయూలో చేరారంటూ వస్తున్న వార్తలన్నీ పూర్తిగా అవాస్తవాలని, కేవలం డయాబెటిస్ కాంప్లికేషన్స్ వల్లే అడ్మిట్ అయ్యారని మీడియాకు వెల్లడించారు. ఈ క్లారిటీతో ప్రభాస్ అభిమానులు, సినిమా ప్రేక్షకులు ఊపిరి పీల్చుకున్నారు.