'కాక్రోచెస్ పార్టీ' నిరసన సక్సెస్.. దేశవ్యాప్తంగా ప్రశంసల జల్లు

దిశ, వెబ్ డెస్క్ : దేశవ్యాప్తంగా తీవ్ర సంచలనం సృష్టిస్తున్న 'కాక్రోచ్ జనతా పార్టీ' (CJP) చేపట్టిన మొదటి నిరసన కార్యక్రమం భారీ సక్సెస్ ను నమోదు చేసింది. ఐఐటీ ప్రవేశ పరీక్ష జేఈఈ (JEE) డేటా లీక్, నీట్ (NEET) పేపర్ లీక్, సీబీఎస్‌ఈ (CBSE) పరీక్షల్లో లోపాలను నిరసిస్తూ.. కేంద్ర విద్యాశాఖ మంత్రి ధర్మేంద్ర ప్రధాన్ తక్షణ రాజీనామా డిమాండ్‌తో జూన్ 6న ఢిల్లీలోని జంతర్ మంతర్ వద్ద CJP మొదటి సారిగా అతిపెద్ద ప్రత్యక్ష నిరసన కార్యక్రమం నిర్వహించింది. ఢిల్లీ హైకోర్టు ఈ నిరసనకు సంబంధించిన ముందస్తు పిల్‌ను అత్యవసరంగా విచారించడానికి నిరాకరించిన నేపథ్యంలో, ఈ ప్రదర్శన ఎటువంటి అవాంఛనీయ సంఘటనలు లేకుండా పూర్తిగా శాంతియుతంగా ముగియడం విశేషం.

ఈ ప్రతిష్టాత్మక నిరసన కార్యక్రమాన్ని నడిపించడానికి CJP వ్యవస్థాపకుడు అభిజీత్ దిప్కే అమెరికా నుండి ప్రత్యేకంగా భారతదేశానికి రావడం గమనార్హం. ఆయన నాయకత్వంలో దేశ రాజధానితో పాటు దేశంలోని వివిధ రాష్ట్రాల నుండి తరలివచ్చిన వేలాది మంది విద్యార్థులు, యువత జంతర్ మంతర్ వద్ద గొంతుకలిపారు. సోషల్ మీడియా ప్లాట్‌ఫారమ్ ఇన్‌స్టాగ్రామ్‌లో ఇప్పటికే 22 మిలియన్ల కంటే ఎక్కువ ఫాలోవర్స్ ను కలిగి ఉన్న ఈ సోషల్ మీడియా సంచలనం.. కేవలం ఆన్‌లైన్ మీమ్స్, రీల్స్‌కే పరిమితం కాకుండా క్షేత్రస్థాయిలోకి విజయవంతంగా ప్రజా ఉద్యమంగా మారి తన సత్తా చాటిందని రాజకీయ విశ్లేషకులు అభిప్రాయపడుతున్నారు.

ప్రస్తుత విద్యా వ్యవస్థలోని లోపాలపై CJP చూపిన ఈ చొరవకు దేశవ్యాప్తంగా విపక్ష పార్టీల అగ్రనేతలు, ప్రముఖ సామాజిక కార్యకర్త సోనామ్ వాంగ్చుక్ వంటి ప్రముఖుల నుండి భారీ మద్దతు లభిస్తోంది. వ్యవస్థాగత లోపాలపై రాజీలేని పోరాటం చేస్తున్న ఈ పార్టీని నెటిజన్లు, యువత ప్రస్తుతం "భారతీయ యువత గొంతుక" గా కొనియాడుతున్నారు. సుప్రీంకోర్ట్ ప్రధాన న్యాయమూర్తి జస్టిస్ సూర్యకాంత్ యువతను కాక్రోచెస్ తో పోల్చడంతో మొదలైన ఈ డిజిటల్ మీడియా పార్టీ ప్రభంజనం.. నేడు దేశ రాజధాని వీధుల్లో పాలకులను ప్రశ్నించే స్థాయికి చేరడంపై రాజకీయ వర్గాల్లో ఆసక్తికరమైన చర్చ నడుస్తోంది.