మాజీ ఎమ్మెల్యే కొమ్మిడి నరసింహారెడ్డి మృతికి సీఎం రేవంత్ రెడ్డి సంతాపం

దిశ, వెబ్ డెస్క్: భువనగిరి మాజీ ఎమ్మెల్యే కొమ్మిడి నరసింహారెడ్డి (కొమ్మిడి నర్సన్న) ఈ రోజు తెల్లవారుజామున వృద్ధాప్య కారణాలతో కన్నుమూశారు. ఆయన మృతి పట్ల తెలంగాణ సీఎం రేవంత్ రెడ్డి తీవ్ర సంతాపం వ్యక్తం చేశారు. 1969 తొలి దశ తెలంగాణ ఉద్యమంలో చురుగ్గా పాల్గొన్న నర్సింహారెడ్డి.. తన తుదిశ్వాస వరకు నీతి నిజాయితీలతో జీవించారని సీఎం కొనియాడారు. గోదావరి జలాల సాధన కోసం, అలాగే మూసీ నది పరిరక్షణ కోసం ఆయన సాగించిన ఉద్యమాలను గుర్తుచేస్తూ.. నిత్యం ప్రజల పక్షాన నిలిచిన గొప్ప ప్రజా సేవకుడు రాష్ట్రం కోల్పోయిందని ఆవేదన వ్యక్తం చేశారు.

భూదానోద్యమానికి 300 ఎకరాల భూమి దానం..

ఆనాడు వినోబా భావే నేతృత్వంలో సాగిన భూదానోద్యమానికి స్ఫూర్తి పొంది, పేదల కోసం తన సొంత 300 ఎకరాల భూమిని దానం చేసిన అరుదైన, గొప్ప మానవతావాది కొమ్మిడి నర్సన్న అని ముఖ్యమంత్రి రేవంత్ రెడ్డి స్మరించుకున్నారు. 1978, 1983 సంవత్సరాలలో రెండు పర్యాయాలు భువనగిరి నియోజకవర్గం నుంచి శాసనసభకు (Assembly) ప్రాతినిధ్యం వహించిన ఆయన.. పదవుల్లో ఉన్నా, లేకున్నా అత్యంత నిరాడంబర జీవితాన్ని గడిపారని తెలిపారు. అనునిత్యం ప్రజా సమస్యలపై రాజీలేని పోరాటం చేసిన నర్సింహారెడ్డి జీవితం నేటి తరం రాజకీయ నాయకులకు ఆదర్శప్రాయమని పేర్కొన్నారు. భగవంతుడు వారి ఆత్మకు శాంతి చేకూర్చాలని ప్రార్థిస్తూ, ఆయన కుటుంబ సభ్యులకు ముఖ్యమంత్రి తన ప్రగాఢ సానుభూతిని తెలియజేశారు.