చరిత్రలో మాయని మచ్చ.. బలవంతపు దత్తత.. బ్రిటన్ బహిరంగ క్షమాపణలు

దిశ, వెబ్ డెస్క్ : బ్రిటన్ చరిత్రలో మాయని మచ్చగా మిగిలిపోయిన "బలవంతపు దత్తతల"(Forced Adoptions) ఉదంతంపై తాజాగా ఆ దేశపు ప్రధాని బహిరంగ క్షమాపణ కోరారు. 1949 నుంచి 1976 వరకు బ్రిటన్ లో అవివాహిత మహిళలకు పుట్టిన పిల్లలను వారి అనుమతి లేకుండా, కొన్నిసార్లు బలవంతంగా అనుమతి తీసుకొని ప్రభుత్వం దత్తతకు ఇచ్చింది. దాదాపు 30 ఏళ్లలో 1.85 లక్షల మంది పసిపిల్లలు ఈ విధంగా దత్తతకు ఇవ్వబడ్డారంటే పరిస్థితి ఏ విధంగా ఉండేదో మనం అర్థం చేసుకోవచ్చు. అవిరామంగా సాగిన ఈ దారుణాల వెనుక ఆనాటి సమాజంలో ఉన్న విపరీతమైన పట్టింపులు, మూఢనమ్మకాలు, ముఖ్యంగా పెళ్లి కాకుండానే గర్భం దాల్చిన "అవివాహిత తల్లుల" పట్ల ఉన్న తీవ్రమైన వివక్ష ప్రధాన కారణాలుగా నిలిచాయి. సమాజం వారిని ఘోరమైన నేరం చేసినవారిలా చూసేది. ఈ సామాజిక ఒత్తిడిని ఆసరాగా చేసుకుని అటు చర్చిలు, ఇటు స్వచ్ఛంద సంస్థలు, ఆసుపత్రులు, ప్రభుత్వ యంత్రాంగం అన్నీ కలిసి.. సదరు మహిళలకు తమ బిడ్డలను పెంచే అర్హత లేదనే ఒక కృత్రిమ వాతావరణాన్ని సృష్టించాయి. దీనివల్ల కేవలం ఇంగ్లాండ్, వేల్స్‌లోనే దాదాపు 1.85 లక్షల మందికి పైగా చిన్నారులు తమ అసలు కన్నతల్లి ప్రేమకు దూరమై, వేరే ప్రాంతాలకు దత్తతగా వెళ్లాల్సి వచ్చింది.

'మదర్ అండ్ బేబీ హోమ్స్' ఘోర ఆకృత్యాలు

ఈ దారుణమైన వ్యవస్థలో అత్యంత క్రూరమైన భాగం ఏమిటంటే "మదర్ అండ్ బేబీ హోమ్స్" నిర్వహణ. సమాజానికి, బంధువులకు దూరంగా రహస్యంగా ఉంచాలనే నెపంతో గర్భం దాల్చిన అవివాహిత మహిళలను ఈ హోమ్స్‌కు బలవంతంగా పంపించేవారు. అక్కడ వారికి మానసిక మద్దతు, మంచి వైద్య సేవలు అందించాల్సింది పోయి, తీవ్రమైన అవమానాలకు, మానసిక హింసకు గురిచేసేవారు. కాన్పు కాగానే కనీసం బిడ్డ ముఖం కూడా చూపించకుండా తల్లుల నుండి వేరు చేయడం, ప్రసవ సమయంలో తీవ్రమైన ఒత్తిడి తెచ్చి, కొన్ని సందర్భాల్లో బలవంతంగా దత్తత పత్రాలపై సంతకాలు తీసుకోవడం వంటివి నిత్యకృత్యంగా సాగాయి. దీనివల్ల లక్షలాది మంది పిల్లలు తమ అసలు తల్లిదండ్రులెవరో తెలియకుండా, తమ మూలాలను, గుర్తింపును పూర్తిగా కోల్పోయి పెరగాల్సి వచ్చింది. ఇది కేవలం ఒక సామాజిక తప్పిదం మాత్రమే కాదు, ప్రభుత్వ వ్యవస్థల మద్దతుతో జరిగిన ఒక పెద్ద మానవ హక్కుల ఉల్లంఘన.

క్షమాపణ సరే.. మానసిక గాయానికి మందేది?

కాగా 3 దశాబ్దాల పాటు సాగిన ఈ అమానవీయ ఘటనలపై గతంలోనే స్కాట్లాండ్, వేల్స్ ప్రభుత్వాలు క్షమాపణలు చెప్పినప్పటికీ, ఇప్పుడు యూకే ప్రభుత్వం తరఫున ప్రధాని సర్ కీర్ స్టార్మర్ పూర్తి అధికారిక క్షమాపణలు చెప్పడం బాధితుల దశాబ్దాల పోరాటానికి దక్కిన గౌరవంగా భావించవచ్చు. ఈ వ్యవస్థలో తమ పాత్ర ఉన్నట్లు చర్చి ఆఫ్ ఇంగ్లాండ్ కూడా అంగీకరిస్తూ క్షమాపణలు కోరింది. అయితే ఈ అధికారిక క్షమాపణలతోనే అంతా ముగిసిపోలేదని, బాధితులకు ఆచరణాత్మక సహాయం అందించాలని ఇప్పుడు డిమాండ్లు వ్యక్తమవుతున్నాయి. దత్తతకు వెళ్లిన పిల్లలు ఇప్పుడు పెద్దవారయ్యారు కాబట్టి వారు తమ అసలు కన్నతల్లులను కలుసుకోవడానికి వీలుగా దశాబ్దాల నాటి పాత హాస్పిటల్, చర్చి రికార్డులను సులభంగా యాక్సెస్ చేసుకునే హక్కు కల్పించాలని, అలాగే ఈ సుదీర్ఘ వేదన వల్ల తీవ్రమైన మానసిక గాయాలతో బతుకుతున్న తల్లులకు, పిల్లలకు ఉచిత ప్రభుత్వ కౌన్సిలింగ్ సేవలు, తగిన ఆర్థిక పరిహారం అందించాలని మానవ హక్కుల సంఘాలు యూరప్ ప్రభుత్వాలను డిమాండ్ చేస్తున్నాయి.