బాల్క సుమన్కు 14 రోజుల రిమాండ్
సింగరేణి సంస్థపై వివాదాస్పద వ్యాఖ్యల కేసులో చెన్నూరు మాజీ ఎమ్మెల్యే, BRS నేత బాల్క సుమన్కు నాంపల్లి కోర్టు 14 రోజుల పాటు జ్యుడీషియల్ రిమాండ్ విధించింది.
దిశ, వెబ్ డెస్క్ : సింగరేణి సంస్థ కార్యాలయాలపై వివాదాస్పద వ్యాఖ్యలు చేశారంటూ నమోదైన కేసులో చెన్నూరు మాజీ ఎమ్మెల్యే, బీఆర్ఎస్ (BRS) కీలక నేత బాల్క సుమన్కు నాంపల్లి కోర్టు 14 రోజుల పాటు జ్యుడీషియల్ రిమాండ్ విధించింది. గతంలో సింగరేణి సంస్థను, అధికారులను ఉద్దేశించి బాల్క సుమన్ చేసిన కొన్ని వ్యాఖ్యలపై సదరు అధికారులు నాంపల్లి పోలీస్ స్టేషన్లో ఫిర్యాదు చేశారు. ఈ ఫిర్యాదు ఆధారంగా కేసు నమోదు చేసిన పోలీసులు, శనివారం హైదరాబాద్లోని బీఆర్ఎస్ ప్రధాన కార్యాలయమైన 'తెలంగాణ భవన్' వద్ద భారీ బందోబస్తు మధ్య బాల్క సుమన్ను అదుపులోకి తీసుకున్నారు. ఈ అరెస్టు సమయంలో తెలంగాణ భవన్ పరిసరాల్లో బీఆర్ఎస్ శ్రేణులు పెద్ద ఎత్తున నిరసన తెలపడంతో తీవ్ర ఉద్రిక్త పరిస్థితులు నెలకొన్నాయి.
అరెస్టు అనంతరం బాల్క సుమన్ను పోలీస్ స్టేషన్కు తరలించిన అధికారులు, దాదాపు ఆరున్నర గంటల పాటు సుదీర్ఘంగా విచారించి ఆయన స్టేట్మెంట్ను రికార్డు చేశారు. ఆ తర్వాత నిబంధనల ప్రకారం ఆయనకు ప్రభుత్వ ఆసుపత్రిలో వైద్య పరీక్షలు నిర్వహించారు. శనివారం రాత్రి దాటిన తర్వాత నాంపల్లి కోర్టు న్యాయమూర్తి ఎదుట ప్రవేశపెట్టగా, కేసు తీవ్రతను పరిశీలించిన జడ్జి ఆయనకు 14 రోజుల రిమాండ్ విధిస్తూ ఉత్తర్వులు జారీ చేశారు. అనంతరం పోలీసులు ఆయనను గట్టి భద్రత నడుమ హైదరాబాద్లోని చంచల్గూడ కేంద్ర జైలుకు తరలించారు. ప్రభుత్వ నిరంకుశత్వానికి ఈ అరెస్టే నిదర్శనమంటూ బీఆర్ఎస్ నాయకులు, శ్రేణులు ఈ చర్యను తీవ్రంగా ఖండిస్తున్నాయి.
