అమరావతి పనుల్లో వేగం.. త్వరలో జీఏడీకి ప్రభుత్వ భవనాలు: మంత్రి నారాయణ

దిశ, వెబ్ డెస్క్: రాష్ట్ర రాజధాని అమరావతి పనుల పురోగతిపై ఆంధ్రప్రదేశ్ మున్సిపల్ పరిపాలన, పట్టణాభివృద్ధి శాఖ మంత్రి పి. నారాయణ (Minister P. Narayana) నేడు (మే 12, 2026) కీలక ప్రకటన చేశారు. అమరావతిలో అభివృద్ధి పనులు అత్యంత వేగంగా జరుగుతున్నాయని, మూడు షిఫ్టుల్లో పనులను కొనసాగిస్తున్నామని ఆయన వెల్లడించారు. ఈ సందర్భంగా ప్రతిపక్షాలు కావాలనే అమరావతి ప్రాజెక్ట్ పై రాజకీయ కుట్రలు చేస్తున్నాయని, అసత్య ప్రచారాలతో ప్రజలను తప్పుదోవ పట్టించే ప్రయత్నం చేస్తున్నాయని ఆయన మండిపడ్డారు.

అలాగే రైతులకు ప్లాట్ల కేటాయింపు ప్రక్రియపై స్పష్టతనిస్తూ, ల్యాండ్ పూలింగ్ కింద భూములిచ్చిన రైతుల్లో ఇప్పటి వరకు 98.06 శాతం మందికి ప్లాట్ల కేటాయింపు పూర్తయిందని మంత్రి తెలిపారు. ఇంకా కేవలం 674 మంది రైతులకు మాత్రమే ప్లాట్లు ఇవ్వాల్సి ఉందని, అది కూడా కోర్టు కేసులు, ఇతర సాంకేతిక కారణాల వల్ల పెండింగ్‌లో ఉందని వివరించారు. ప్లాట్ల కేటాయింపు అంతా అత్యంత పారదర్శకంగా లాటరీ పద్ధతిలో జరిగిందని ఆయన స్పష్టం చేశారు.

అమరావతిలో మంత్రులు, ఐఏఎస్ అధికారులు, న్యాయమూర్తుల కోసం నిర్మిస్తున్న నివాస భవనాలు తుది దశకు చేరుకున్నాయని నారాయణ పేర్కొన్నారు. మే నెలాఖరు నాటికి దాదాపు 90 శాతం ప్రభుత్వ భవనాలు సిద్ధమవుతాయని, ఫినిషింగ్ పనులు పూర్తి కాగానే వాటన్నింటినీ సాధారణ పరిపాలన శాఖ (GAD)కు అప్పగిస్తామని వెల్లడించారు. రాజధాని నిర్మాణాన్ని మూడు దశల్లో పూర్తి చేయాలని లక్ష్యంగా పెట్టుకున్నామని, మొదటి దశను నిర్ణీత గడువులోగా పూర్తి చేసి ఆంధ్రుల కలల రాజధానిని ప్రపంచ స్థాయి నగరంగా తీర్చిదిద్దుతామని మంత్రి ధీమా వ్యక్తం చేశారు.