రాహా కోసం ఎలాంటి నిర్ణయం తీసుకోవడానికైనా సిద్ధమే.. షాకిచ్చిన ఆలియా భట్!

దిశ, సినిమా: బాలీవుడ్ స్టార్ హీరోయిన్ ఆలియా భట్(Alia Bhatt) లైఫ్ ఇప్పుడు పూర్తిగా మారిపోయింది. ఒకప్పుడు తన గ్లామరస్ ఫోటోలతో సోషల్ మీడియాను షేక్ చేసిన ఈ బ్యూటీ, ఇప్పుడు తన కూతురు రాహా కపూర్‌తో గడిపేందుకే ప్రాధాన్యత ఇస్తోంది. మాతృత్వం తనలో తెచ్చిన మార్పుల గురించి అలియా ఆసక్తికర విషయాలు పంచుకుంది. ఓ ఇంటర్వ్యూలో పాల్గొన్న ఆలియా ‘‘కొన్ని రోజులు లేవగానే ఇన్ స్టాగ్రామ్ అకౌంట్ డిలీట్ చేసి, ప్రశాంతంగా సినిమా పని చూసుకోవాలనిపిస్తుంది. కానీ నన్ను ప్రేమించే ఫ్యాన్స్ కోసం ఆ నిర్ణయాన్ని వాయిదా వేసుకుంటున్నాను’’ అని తెలిపింది.

గతంలో ఆలియా ఫోన్ గ్యాలరీ నిండా తన ఫోటోలే ఉండేవట. కానీ ఇప్పుడు కేవలం తన కూతురు రాహా విజువల్స్ మాత్రమే ఉంటున్నాయట. తన సొంత ఫోటోలు తీసుకోవాలంటే ఇప్పుడు స్పెషల్‌గా టైమ్ కేటాయించాల్సి వస్తోందని ఆమె సరదాగా పేర్కొంది. ‘‘రాహా నా ప్రపంచంలోకి వచ్చాక నేను పాత అలియాను మర్చిపోయాను. తొమ్మిది నెలల్లో ఒక మనిషిలో ఇంత మార్పు వస్తుందని ఊహించలేదు’’ అంటూ ఎమోషనల్ అయింది. ఇక తన కూతురు ప్రైవసీ కోసం జాగ్రత్తలు తీసుకుంటున్నట్లు చెప్పిన ఆమె.. రాహా భద్రత కోసం ఎలాంటి నిర్ణయం తీసుకోవడానికైనా సిద్ధంగా ఉన్నట్లు వెల్లడించింది. సోషల్ మీడియాకు దూరం కావడంతో పాటు.. ఇండస్ట్రీకి కూడా దూరం అయ్యే అవకాశం ఉన్నట్లు హింట్ ఇచ్చింది. దీంతో ఈ విషయం తెలుసుకున్న నెటిజన్లు షాక్ అవుతున్నారు. ఇక ఆలియా నటిస్తున్న సినిమాల విషయానికొస్తే..​ ప్రస్తుతం భారీ యాక్షన్ మూవీ 'ఆల్ఫా' (Alpha) షూటింగ్‌లో బిజీగా ఉంది.

ఇందులో ఆమెతో పాటు శార్వరీ వాఘ్ కూడా నటిస్తోంది. శివ్ రవైల్ దర్శకత్వం వహిస్తున్న ఈ సినిమాను యశ్‌రాజ్ ఫిల్మ్స్ నిర్మిస్తున్నారు. లేడీ ఓరియెంటెడ్ యాక్షన్ థ్రిల్లర్‌గా రాబోతుండగా.. బాబీ డియోల్, అనిల్ కపూర్ కీలక పాత్రలో కనిపించబోతున్నారు. షూటింగ్ జరుపుకుంటున్న ఈ సినిమాను ఏప్రిల్ 17న ప్రేక్షకుల ముందుకు తీసుకురావాలని మూవీ మేకర్స్ ప్లాన్ చేస్తున్నారు. దీంతో పాటు ఆలియా తన సోదరి షాహీన్ భట్‌తో కలిసి 'డోంట్ బీ షై' (Don't Be Shy) అనే మూవీతో ప్రొడ్యూసర్‌గానూ సత్తా చాటబోతోంది.