TG EAPCET అభ్యర్థులకు అలర్ట్.. ఎడిట్ ఆప్షన్‌కు నేడే ఆఖరి గడువు

దిశ, వెబ్ డెస్క్: తెలంగాణ ఇంజినీరింగ్, అగ్రికల్చర్, ఫార్మసీ కోర్సుల్లో ప్రవేశాల కోసం నిర్వహించే TG EAPCET - 2026 దరఖాస్తుల సవరణకు (Edit Option) ప్రభుత్వం కల్పించిన గడువు నేటితో (ఏప్రిల్ 8, 2026) ముగియనుంది. అప్లికేషన్లలో పొరపాట్లు దొర్లిన అభ్యర్థులు తమ వివరాలను సరిచేసుకోవడానికి అధికారులు ఇచ్చిన ఈ అవకాశాన్ని వినియోగించుకోవాలని సూచించారు. అయితే, పేరు, తండ్రి పేరు, పుట్టిన తేదీ, సంతకం, ఫోటో, ఇంటర్ హాల్‌టికెట్ నంబర్ వంటి కీలక వివరాలను అభ్యర్థులు నేరుగా ఆన్‌లైన్‌లో మార్చుకోలేరు. వీటి సవరణ కోసం విద్యార్థులు తగిన ఆధారాలతో హైదరాబాద్‌లోని JNTU కన్వీనర్ కార్యాలయాన్ని సంప్రదించాల్సి రావడంతో అక్కడ విద్యార్థుల రద్దీ పెరిగింది. మిగిలిన వివరాలను అధికారిక వెబ్‌సైట్ ద్వారా ఆన్‌లైన్‌లోనే సవరించుకోవచ్చని అధికారులు సూచించారు.

నోటిఫికేషన్ , దరఖాస్తుల వివరాలు

ఈ ఏడాది ఈ ఏపీ సెట్ కోసం సాధారణ స్థాయిలో దరఖాస్తులు వచ్చాయి. నోటిఫికేషన్ విడుదలైన నాటి నుంచి ఇప్పటివరకు సుమారు 3.5 లక్షలకు పైగా విద్యార్థులు దరఖాస్తు చేసుకున్నట్లు సమాచారం. ఇందులో ఇంజినీరింగ్ విభాగానికి సుమారు 2.5 లక్షలు, అగ్రికల్చర్, ఫార్మసీ విభాగాలకు మరో 1 లక్ష వరకు దరఖాస్తులు అందాయి. మే నెలలో జరగనున్న ఈ పరీక్షల కోసం ఇప్పటికే అధికారులు పక్కా ఏర్పాట్లు చేస్తున్నారు. అభ్యర్థులు తమ హాల్‌టికెట్లను ఏప్రిల్ మూడవ వారం నుండి డౌన్‌లోడ్ చేసుకోవచ్చని అధికారులు వెల్లడించారు.