మిడిల్ ఈస్ట్ వార్ ఎఫెక్ట్.. భారీగా పెరగనున్న విమాన చార్జీలు!

దిశ, వెబ్ డెస్క్ : పశ్చిమాసియాలో ముదురుతున్న యుద్ధ జ్వాలలు విమానయాన రంగాన్ని కుదిపేస్తున్నాయి. మిడిల్ ఈస్ట్ యుద్ధం కారణంగా అంతర్జాతీయ మార్కెట్‌లో ముడిచమురు ధరలు భగ్గుమనడంతో, విమాన ఇంధనం (ATF) ధరలు గతంలో ఎన్నడూ లేని విధంగా పెరిగాయి. 2026 మార్చి నాటికి బ్యారెల్ జెట్ ఫ్యూయల్ ధర గతంలోని 85-90 డాలర్ల నుండి ఏకంగా 150-200 డాలర్ల పైచిలుకు చేరింది. అంటే దాదాపు 50% నుండి 150% వరకు పెరుగుదల నమోదైంది. భారతదేశంలో కూడా ఏటీఎఫ్ ధరలు 30-50% మేర పెరగడం వల్ల విమానయాన సంస్థల బడ్జెట్ పూర్తిగా తలకిందులైంది. దీనికి తోడు యుద్ధ క్షేత్రానికి సమీపంలో ఉన్న పాకిస్తాన్, ఇరాన్, ఇరాక్ వంటి దేశాల ఎయిర్‌స్పేస్‌లు మూతపడటంతో, విమానాలను సుదూర మార్గాల గుండా మళ్లించాల్సి వస్తోంది. దీనివల్ల ప్రయాణ సమయం గంటల తరబడి పెరగడమే కాకుండా, అదనపు ఇంధన వినియోగం వల్ల ఎయిర్‌లైన్స్‌పై మోయలేని భారం పడుతోంది.

కేవలం ఇంధన ధరలే కాకుండా, వార్-రిస్క్ ఇన్సూరెన్స్ ప్రీమియంలు పెరగడం విమానయాన సంస్థలను మరింత సంక్షోభంలోకి నెట్టింది. యుద్ధ ప్రాంతాల మీదుగా లేదా వాటికి సమీపంలో ప్రయాణించే విమానాలకు బీమా కంపెనీలు భారీగా ఛార్జీలను పెంచేశాయి. ప్రస్తుతం నారోబాడీ విమానానికి ఒక రౌండ్ ట్రిప్‌కు రూ. 30 లక్షలు, వైడ్‌బాడీ విమానానికి ఏకంగా కోటి రూపాయల పైగా అదనపు ఇన్సూరెన్స్ ప్రీమియం చెల్లించాల్సి వస్తోంది. ఈ అదనపు ఖర్చులన్నింటినీ విమానయాన సంస్థలు 'ఫ్యూయల్ సర్‌చార్జ్' రూపంలో నేరుగా ప్రయాణీకులపైనే వేస్తున్నాయి. మరోవైపు, యుద్ధ భయాల వల్ల విమాన సర్వీసుల సంఖ్య తగ్గడం మరియు అదే సమయంలో అత్యవసర ప్రయాణాల డిమాండ్ పెరగడం వల్ల 'డిమాండ్-సప్లై' మధ్య భారీ వ్యత్యాసం ఏర్పడింది. ముఖ్యంగా అంతర్జాతీయ రూట్లలో టికెట్ ధరలు రెట్టింపు అయ్యే అవకాశం ఉంది.

అయితే సాధారణంగా ప్రతి ఏటా ఏప్రిల్ 1న విమాన టికెట్ల ధరలను సవరిస్తారు. పెరిగిన ఫ్యూయెల్ ధరలను దృష్టిలో ఉంచుకొని టికెట్ల ధరలు కూడా పెరిగే అవకాశం ఉందని కేంద్ర విమానయానశాఖ అంచనా వేస్తోంది. అయితే ఎంత పెరగవచ్చని అనేది మాత్రం ఇప్పుడే చెప్పలేమని కేంద్రమంత్రి రామ్మోహన్ నాయుడు పేర్కొన్నారు. కాగా రాబోయే వేసవి సెలవుల దృష్ట్యా ప్రయాణ ప్లాన్లు చేసుకున్న వారికి ఇది పెద్ద షాక్ అనే చెప్పాలి. యుద్ధం త్వరగా ముగిసి సాధారణ స్థితి నెలకొంటే తప్ప విమాన చార్జీలు తగ్గే సూచనలు కనిపించడం లేదు. ఎయిర్‌లైన్స్ తమ మనుగడ సాగించడానికి ఇప్పటికే పెంచిన సర్ చార్జీలను కొన్ని నెలల పాటు కొనసాగించే అవకాశం ఉంది.