హైదరాబాద్‌లో నేడే అరుదైన ఖగోళ వింత.. మిట్ట మధ్యాహ్నం మీ నీడ మాయం

దిశ, వెబ్‌డెస్క్: భాగ్యనగర వాసులకు నేడు (మే 9న) ఒక అద్భుతమైన అనుభవం ఎదురుకానుంది. మధ్యాహ్నం వేళ కాసేపు వస్తువుల నీడలు కనిపించకుండా మాయమైపోయే 'జీరో షాడో డే' ఆవిష్కృతం కానుంది. ఖగోళ శాస్త్రంపై ఆసక్తి ఉన్న వారికి, విద్యార్థులకు ఇది ఒక గొప్ప అభ్యాస అవకాశం. సరిగ్గా మధ్యాహ్నం 12 గంటల 12 నిమిషాలకు ఈ అద్భుతం కనిపించనుంది.

అసలేమిటి ఈ జీరో షాడో డే?

సూర్యుడు సరిగ్గా మన నెత్తిమీదకు వచ్చినప్పుడు (12.12 గంటలకు), సూర్యకిరణాలు భూమికి 90 డిగ్రీల కోణంలో నిలువుగా పడతాయి. ఆ సమయంలో భూమిపై నిటారుగా ఉన్న ఏ వస్తువు నీడ అయినా దాని కిందకే చేరుతుంది. దీనివల్ల నీడ పక్కకు కనిపించకుండా మాయమైనట్లు అనిపిస్తుంది. ఈ వింత కేవలం ఒకటి నుండి రెండు నిమిషాల పాటు మాత్రమే కొనసాగుతుంది.

ఎందుకు జరుగుతుంది?

భూమి తన అక్షం మీద వంగి ఉండటం, సూర్యుని చుట్టూ తిరిగే క్రమంలో సూర్యుడు కర్కట రేఖ, మకర రేఖల మధ్య అక్షాంశాల మీదుగా సంచరిస్తున్నట్లు కనిపిస్తుంది. ఈ క్రమంలో ఏడాదికి రెండుసార్లు సూర్యుడు నిర్దిష్ట అక్షాంశాల మీదుగా వెళ్తున్నప్పుడు ఆయా ప్రాంతాల్లో జీరో షాడో డే ఏర్పడుతుంది. ట్రాపిక్ జోన్లలో ఉండే నగరాల్లో మాత్రమే ఈ దృశ్యం కనిపిస్తుంది.

హైదరాబాద్‌లో ఎక్కడ చూడవచ్చు?

ఆకాశం నిర్మలంగా ఉండి, సూర్యరశ్మి నేరుగా పడే బహిరంగ ప్రదేశాల్లో దీనిని స్పష్టంగా గమనించవచ్చు. బేగంపేట, సికింద్రాబాద్, బంజారాహిల్స్, జూబ్లీహిల్స్, కూకట్‌పల్లి, గచ్చిబౌలి, ఉప్పల్, హిమాయత్‌నగర్ ప్రాంతాల్లో.. స్కూల్ గ్రౌండ్లు, పార్కులు, ఇంటి మేడల మీద నిటారుగా ఉండే బాటిళ్లు లేదా కర్రలను ఉంచి ఈ వింతను చూడవచ్చు. బిర్లా ప్లానిటోరియంలో దీనిపై ప్రత్యేక అవగాహన సదస్సులు నిర్వహించనున్నారు. ప్రస్తుతం హైదరాబాద్‌లో ఎండలు తీవ్రంగా ఉన్నాయి. మధ్యాహ్నం సమయంలో ఈ ఖగోళ వింతను చూడాలనుకునే వారు వడదెబ్బ తగలకుండా తగిన జాగ్రత్తలు తీసుకోవాలి. గొడుగులు వాడటం, కాటన్ దుస్తులు ధరించడం, తగినంత నీరు తాగడం మంచిదని నిపుణులు సూచిస్తున్నారు.