TG: బడి పిల్లలకు సర్కారు కానుక.. 22 వస్తువులతో ‘స్టూడెంట్ కిట్’

దిశ, వెబ్‌డెస్క్: తెలంగాణలోని ప్రభుత్వ విద్యా సంస్థల్లో చదువుతున్న పేద విద్యార్థులకు నాణ్యమైన విద్యతో పాటు అన్ని వసతులను కల్పించే లక్ష్యంతో రాష్ట్ర ప్రభుత్వం ప్రవేశపెట్టిన ప్రతిష్టాత్మక ‘యంగ్ ఇండియా స్టూడెంట్ కిట్' (Young India Student Kit) పంపిణీ కార్యక్రమం నేడు అట్టహాసంగా ప్రారంభం కానుంది. హైదరాబాద్‌లోని ఎల్బీ స్టేడియంలో నిర్వహించనున్న ఈ భారీ బహిరంగ వేదికపై గౌరవ గవర్నర్ శివప్రతాప్ శుక్లాతో కలిసి ముఖ్యమంత్రి రేవంత్ రెడ్డి విద్యార్థులకు ఈ కిట్లను స్వయంగా పంపిణీ చేయనున్నారు. ఈ వినూత్న విద్యా కార్యక్రమం ప్రారంభోత్సవానికి సర్కారు విద్యా సంస్థల నుండి దాదాపు 15,000 మంది విద్యార్థులు హాజరుకానున్నారు. రాష్ట్రవ్యాప్తంగా ఉన్న ప్రభుత్వ పాఠశాలలు, కస్తూర్బా గాంధీ బాలికా విద్యాలయాలు (KGBV), సంక్షేమ వసతి గృహాలు (Hostels), అలాగే వివిధ సామాజిక వర్గాల గురుకుల పాఠశాలల విద్యార్థులందరికీ ఈ పథకం వర్తించనుంది.

విద్యార్థుల అవసరాలకు తగ్గట్టుగా 'స్టూడెంట్ కిట్లు'..

విద్యార్థులు చదువుకునే విద్యా సంస్థల రకాన్ని బట్టి, వారి అవసరాలకు అనుగుణంగా ప్రభుత్వం ఈ కిట్లలోని వస్తువులను ప్రత్యేకంగా రూపొందించింది. గురుకులాల్లో ఉండి చదువుకునే విద్యార్థులకు నిత్యావసరాలు, విద్యా సామగ్రితో కూడిన అత్యధికంగా 22 రకాల వస్తువులను ఈ కిట్లో చేర్చారు. ప్రభుత్వ హాస్టళ్లలో ఉండే విద్యార్థుల రోజువారీ అవసరాలకు సరిపోయేలా 10 రకాల వస్తువులతో కూడిన కిటు అందిస్తున్నారు. రోజూ బడికి వచ్చి వెళ్లే విద్యార్థుల కోసం పుస్తకాలు, స్టేషనరీతో కూడిన 7 రకాల ముఖ్యమైన వస్తువులను ఈ కిట్ ద్వారా పంపిణీ చేయనున్నారు. పేద విద్యార్థులకు చదువు భారం కాకూడదనే ఉద్దేశంతో, కార్పొరేట్ పాఠశాలలకు తీసిపోని విధంగా నాణ్యమైన వస్తువులతో ఈ 'యంగ్ ఇండియా స్టూడెంట్ కిట్'లను తెలంగాణ ప్రభుత్వం సిద్ధం చేసింది. నేటి ప్రారంభోత్సవం అనంతరం రాష్ట్రవ్యాప్తంగా అన్ని జిల్లాల్లోని ప్రభుత్వ విద్యార్థులకు వీటిని విడతల వారీగా పంపిణీ చేయనున్నారు.