టీజీఎన్పీ డీసీఎల్ లో వ‌న్ మినిట్ రూల్

దిశ‌, హ‌న్మ‌కొండ టౌన్ : తెలంగాణ నార్తర్న్ పవర్ డిస్ట్రిబ్యూషన్ కంపెనీ లో “వన్ మినిట్ రూల్” అనే ప్రత్యేక భద్రతా విధానాన్ని అమలు చేస్తున్నామని సీఎండీ కర్నాటి వరుణ్ రెడ్డి తెలిపారు. ఈ నియమం ద్వారా ప్రతి పనికి ముందుగా కేవలం ఒక నిమిషం సమయం కేటాయించి అవసరమైన భద్రతా చర్యలను పరిశీలించడం తప్పనిసరి చేయబడిందని పేర్కొన్నారు. ఈ సంద‌ర్భంగా ఆయన మాట్లాడుతూ వన్ మినిట్ రూల్” అంటే క్షేత్ర స్థాయిలో పనిని ప్రారంభించే ముందు సిబ్బంది ఒక్క నిమిషం పాటు ఆగి, అన్ని భద్రతా ప్రమాణాలు సరిగా ఉన్నాయా అనే విషయాన్ని నిర్ధారించుకోవడం ఈ నియమం ముఖ్య ఉద్దేశ్యమని, చిన్న నిర్లక్ష్యం పెద్ద ప్రమాదాలకు దారి తీసే అవకాశం ఉన్నందున, ఈ ఒక్క‌ నిమిషం సమయం ప్రాణాలను కాపాడగలదని సూచించారు. ఈ నియమం ద్వారా ప్రమాదాలను తగ్గించడం, సిబ్బంది ప్రాణాలను రక్షించడం, విద్యుత్ సరఫరా వ్యవస్థను మరింత సురక్షితంగా నిర్వహించడం లక్ష్యంగా పెట్టుకున్నామని వివరించారు. ప్రతి ఉద్యోగి ఈ నియమాన్ని కచ్చితంగా పాటించాలనే దిశగా టిజీ ఎన్పీడీసీఎల్ ప్రత్యేక చర్యలు తీసుకుంటోందని చెప్పారు.