రేవంత్ రెడ్డి చేతుల మీదుగా తెలంగాణ ‘ఉత్తమ ప్రిన్సిపల్’ అవార్డు అందుకున్న డాక్టర్ మల్లం నవీన్

దిశ, హన్మకొండ టౌన్: కాకతీయ విశ్వవిద్యాలయ పాలక మండలి సభ్యులు, నర్సంపేట ప్రభుత్వ డిగ్రీ కళాశాల (అటానమస్) ప్రిన్సిపల్ డాక్టర్ మల్లం నవీన్ రాష్ట్ర స్థాయి “ఉత్తమ ప్రిన్సిపల్” పురస్కారాన్ని అందుకున్నారు. తెలంగాణ ప్రభుత్వం నిర్వహించిన “ప్రజా పాలన ప్రగతి ప్రణాళిక – విద్యా వారోత్సవాలు” కార్యక్రమంలో భాగంగా ఈ అవార్డును ముఖ్యమంత్రి రేవంత్ రెడ్డి చేతుల మీదుగా అందుకున్నారు. ఈ సందర్భంగా కళాశాల అభివృద్ధి కోసం రూ.1 లక్ష ప్రోత్సాహక నిధి, రూ.10 వేల నగదు బహుమతిని కూడా అందించారు. ఈ సందర్భంగా డాక్టర్ మల్లం నవీన్ మాట్లాడుతూ... ఈ పురస్కారం తన వ్యక్తిగత విజయమే కాకుండా కళాశాల అధ్యాపకులు, బోధనేతర సిబ్బంది, విద్యార్థుల సమిష్టి కృషికి లభించిన గుర్తింపని తెలిపారు. ఈ సందర్భంగా కాకతీయ విశ్వవిద్యాలయ వైస్ ఛాన్సలర్ ఆచార్య కే. ప్రతాప్ రెడ్డి, రిజిస్ట్రార్ ఆచార్య వి. రామచంద్రం.. డాక్టర్ మల్లం నవీన్‌కు హృదయపూర్వక అభినందనలు తెలిపారు.