GST అప్పిలేట్ ట్రైబ్యునల్ జ్యుడీషియల్ మెంబర్‌గా వేమిరెడ్డి భాస్కర్ రెడ్డి

దిశ, వెబ్‌డెస్క్: కేంద్ర ప్రభుత్వం తెలంగాణ హైకోర్టు సీనియర్ న్యాయవాది వేమిరెడ్డి భాస్కర్ రెడ్డిని గూడ్స్ అండ్ సర్వీసెస్ ట్యాక్స్ అప్పిలేట్ ట్రైబ్యునల్ (GSTAT) జ్యుడీషియల్ సభ్యుడిగా నియమించింది. జీఎస్టీ అప్పిలేట్ ట్రైబ్యునల్ దేశ వ్యాప్తంగా పూర్తిగా అందుబాటులోకి తీసుకురావాలన్న కేంద్ర ప్రభుత్వం ఈ నియామకాలను చేపట్టింది. మొత్తం 53 మందిని జ్యుడీషియల్ మెంబర్లుగా నియమిస్తూ ఇవాళ ఉత్తర్వులు జారీ అయ్యాయి. జీఎస్టీ విధానంలో వివాదాల పరిష్కారానికి ఇది ఒక ముందడుగని విశ్లేషకులు పేర్కొంటున్నారు.

అయితే, గూడ్స్ అండ్ సర్వీసెస్ ట్యాక్స్ అప్పిలేట్ ట్రైబ్యునల్ (GSTAT) జ్యుడీషియల్ సభ్యుడి ఎంపికైన వేమిరెడ్డి భాస్కర్ రెడ్డి తెలంగాణ హైకోర్టులో సీనియర్ న్యాయవాదిగా సేవలందిస్తున్నారు. ఆయన 1987లో న్యాయవాదిగా నమోదు చేసుకుని.. అప్పటి నుంచి హైదరాబాద్ హైకోర్టులో ప్రాక్టీస్ చేస్తున్నారు. పన్నుల చట్టాలలో ఆయనకు మంచి ప్రావీణ్యం సంపాదించారు. ఇదే అనుభవంతో 1993లో పన్నుల విభాగంలో ప్రత్యేక అసిస్టెంట్ ప్రభుత్వ ప్లీడర్‌గా నియమితులై జూన్ 1994 వరకు ఆ పదవిలో కొనసాగారు. తెలంగాణ హైకోర్టు 2022లో ఆయనను సీనియర్ న్యాయవాదిగా గుర్తించింది. అప్పటి నుంచి ఆయన రెండు తెలుగు రాష్ట్రాలలోనూ మంచి ప్రాక్టీస్‌ను కొనసాగిస్తున్నారు.

బలమైన, సమర్థవంతమైన జీఎస్టీ అప్పిలేట్ వ్యవస్థను ఏర్పాటు చేయడం వల్ల వివాదాల పరిష్కారానికి పట్టే సమయం తగ్గడంతో పాటు, పరోక్ష పన్నుల వ్యవస్థపై నమ్మకం కూడా పెరుగుతుంది. ఒక ప్రత్యేకమైన ట్రిబ్యునల్ ఏర్పాటు చేయడం ద్వారా జీఎస్టీకి సంబంధించిన వివాదాలను మరింత వేగంగా, నైపుణ్యంతో, తక్కువ భారం కలిగించే విధంగా పరిష్కరించాలని ప్రభుత్వం లక్ష్యంగా పెట్టుకుంది. ఇది త్వరగా కేసుల పరిష్కారానికి, ఉన్నత న్యాయస్థానాలలో కేసుల సంఖ్య తగ్గడానికి, ఒక స్థిరమైన పన్నుల వాతావరణానికి దారితీస్తుంది. వివాదాలు సకాలంలో, నిష్పక్షపాతంగా పరిష్కరించబడతాయని వ్యాపారులకు నమ్మకం కలిగినప్పుడు, వారు మరింత ఆత్మవిశ్వాసంతో పని చేయగలుగుతారు. ఇది మొత్తం పన్నుల వ్యవస్థపై నమ్మకాన్ని పెంపొందించనుంది.