పవిత్రమైన అయ్యప్ప మాల ధరించిన ఇద్దరు ట్రాన్స్జెండర్లు
పవిత్రమైన అయ్యప్ప మాలను చిన్న పిల్లలు, పురుషులు, 60 సంవత్సరాలు దాటిన మహిళలు(లేదా)రుతుస్రావం లేని స్త్రీలు మాత్రమే వేసుకుంటారు.
దిశ, వెబ్ డెస్క్: పవిత్రమైన అయ్యప్ప మాలను చిన్న పిల్లలు, పురుషులు, 60 సంవత్సరాలు దాటిన మహిళలు(లేదా)రుతుస్రావం లేని స్త్రీలు మాత్రమే వేసుకుంటారు. కానీ నిజామాబాద్ జిల్లా చరిత్ర సృష్టించే ఆధ్యాత్మిక ఘట్టానికి వేదికైంది. భక్తికి లింగ భేదం లేదని చాటి చెబుతూ.. ప్రజ్ఞ, ప్రియ అనే ఇద్దరు ట్రాన్స్జెండర్లు పవిత్రమైన అయ్యప్ప మాల ధారణ చేశారు. ఆలయ గురు స్వామి స్వయంగా వారికి మాల వేసి దీక్ష ఇవ్వడం ఈ ఘటనకు ప్రధాన ఆకర్షణగా నిలిచింది. ఈ అరుదైన దృశ్యం సమాజంలో సమానత్వం, ఆధ్యాత్మిక సమగ్రత పెంపొందించే దిశగా ఒక కీలక ముందడుగు గా పరిగణించవచ్చు. ట్రాన్స్జెండర్ కమ్యూనిటీని ఆధ్యాత్మిక మార్గంలో పూర్తిస్థాయిలో స్వీకరించడానికి సమాజం సిద్ధమవుతోందని ఈ సంఘటన నిరూపించింది.
ప్రజ్ఞ, ప్రియ భక్తికి సంబంధించిన వివరాలు మరింత స్ఫూర్తినిస్తున్నాయి. వీరిద్దరూ గతంలో కూడా అయ్యప్ప మాల ధారణ చేసిన అనుభవం ఉన్నవారేనని, అంతేకాక, అమ్మవారి దీక్షలు సైతం నియమబద్ధంగా పాటిస్తారని సమాచారం. వీరి దీర్ఘకాల నిబద్ధత, మతపరమైన ఆచారాల పట్ల ఉన్న గౌరవాన్ని నిజామాబాద్ ఆలయ గురుస్వామి గుర్తించి, వారికి మాల వేయడం ద్వారా హిందూ ధర్మం యొక్క అంతర్లీనమైన సమగ్రతను, "అందరూ సమానమే" అనే సందేశాన్ని బలంగా తెలియజేశారు. ఈ స్ఫూర్తిదాయకమైన వార్త దేశవ్యాప్తంగా ఆధ్యాత్మిక చర్చకు దారి తీస్తుంది.
