అరుణాచలం వెళ్లాలనుకునే భక్తులకు శుభవార్త.. దిల్షుక్ నగర్ నుంచి నేరుగా బస్సులు
కార్తీక పౌర్ణమి పర్వదినం సమీపిస్తుండటంతో దేశవ్యాప్తంగా భక్తి ఉత్సాహం అలుముకుంది. ముఖ్యంగా తమిళనాడులోని పవిత్ర క్షేత్రం అరుణాచలం వైపు భక్తుల దృష్టి మరలుతుంది.
దిశ, వెబ్ డెస్క్: కార్తీక పౌర్ణమి పర్వదినం సమీపిస్తుండటంతో దేశవ్యాప్తంగా భక్తి ఉత్సాహం అలుముకుంది. ముఖ్యంగా తమిళనాడులోని పవిత్ర క్షేత్రం అరుణాచలం (Arunachalam) వైపు భక్తుల దృష్టి మరలుతుంది. కార్తీక మాసం (Kartikamasam)లో శివుని ఆరాధనకు విశేష ప్రాధాన్యత ఉండటంతో.. వేలాది మంది భక్తులు గిరి ప్రదక్షిణ కోసం అక్కడకు వెళ్ళడానికి ఎన్నో ప్రయత్నాలు చేస్తున్నారు. ఇటీవల కాలంలో అరుణాచలానికి తెలుగు రాష్ట్రాల నుంచి అత్యధిక సంఖ్యలో భక్తులు, పర్యాటకులు వెళ్తున్నారు. అయితే నేరుగా అక్కడికి వెళ్లడానికి సరైన రవాణా వ్యవస్థ లేకపోవడంతో భక్తులు ఇబ్బంది పడుతున్నారు. ఈ నేపధ్యంలో, హైదరాబాద్ నగరంలోని దిల్షుక్ నగర్ – అరుణాచల (Dilsukhnagar – Arunachalam) గిరి మార్గంలో భక్తుల సౌకర్యార్థం అధికారులు ప్రత్యేక ఏర్పాట్లు ప్రారంభించారు. నవంబర్ 3న జరగబోయే కార్తీక పౌర్ణమి రోజును దృష్టిలో పెట్టుకొని.. TSRTC ప్రత్యేక బస్సులను (TSRTC special buses) కూడా నడపనున్నట్లు ప్రకటించింది.
దిల్షుక్ నగర్ నుంచి అరుణాచలం దాకా భక్తుల రాకపోకల కోసం ప్రత్యేక సర్వీసులను ఇప్పటికే ప్రారంభించగా, అవసరమైతే మరిన్ని బస్సులు కూడా ప్రవేశపెట్టనున్నట్లు అధికారులు వెల్లడించారు. ప్రతి సంవత్సరం లక్షలాది మంది భక్తులు గిరి ప్రదక్షిణకు వెళ్లే సందర్భంలో తీవ్రమైన రద్దీ, వసతి సమస్యలు ఎదురయ్యేవి. అయితే, ఈసారి ముందస్తుగానే ఏర్పాట్లు ప్రారంభించడంతో భక్తులకు ఎంతో సౌకర్యం కలుగుతుంది. ముఖ్యంగా దిల్షుక్ నగర్, ఎల్బీనగర్, వనస్థలిపురం ప్రాంతాల నుంచి అరుణాచలం వెళ్లే భక్తుల కోసం ప్రత్యేక టిక్కెట్ కౌంటర్లు, ఆన్లైన్ బుకింగ్ సౌకర్యం కూడా అందుబాటులోకి రానుంది. ఈ నేపథ్యంలో, “అరుణాచలం వెళ్లాలని కోరిక కలిగిన భక్తులకు ఇది నిజమైన శుభవార్త” అని అధికారులు పేర్కొన్నారు. కార్తీక పౌర్ణమి రోజున శివాలయాల్లో జరిగే పూజలతో పాటు, అరుణాచల గిరి దర్శనంతో కార్తీక మాసం మరింత భక్తిరస పూరితంగా మారనుంది.
