TG: గ్రామీణ యువత ప్రతిభను ప్రపంచానికి పరిచయం చేస్తాం: మంత్రి కోమటిరెడ్డి

దిశ, వెబ్‌డెస్క్: సినిమా రంగానికి సీఎం రేవంత్ రెడ్డి(CM Revanth Reddy) నేతృత్వంలోని ప్రజా ప్రభుత్వం ప్రత్యేక ప్రాధాన్యత ఇస్తోందని సంబందిత శాఖా మంత్రి కోమటిరెడ్డి వెంకట్ రెడ్డి(Komatireddy Venkat Reddy) అన్నారు. సోమవారం హైదరాబాద్‌లోని రవీంద్ర భారతి వేదికగా సినిమాటోగ్రఫీ శాఖ ఆధ్వర్యంలో తెలంగాణ ఫిల్మ్ డెవలప్మెంట్ కార్పొరేషన్ నిర్వహించిన “బతుకమ్మ యంగ్ ఫిల్మ్ మేకర్స్ ఛాలెంజ్” అవార్డుల ప్రదానోత్సవ కార్యక్రమంలో మంత్రి కోమటిరెడ్డి పాల్గొన్నారు. జ్యూరీ సభ్యులకు, అవార్డు విజేతలకు ఈ సందర్భంగా అభినందనలు తెలిపారు. అనంతరం మాట్లాడుతూ.. ఈ కార్యక్రమం కేవలం పోటీ మాత్రమే కాదు, గ్రామీణ ప్రాంతాల్లో దాగి ఉన్న ప్రతిభను వెలుగులోకి తీసుకొచ్చిన గొప్ప వేదికగా నిలిచిందని కొనియాడారు. యువత సృజనాత్మకతకు ప్రోత్సాహం ఇస్తూ కళ, సంస్కృతి, సినిమారంగాలకు తెలంగాణ ప్రభుత్వం ప్రత్యేక ప్రాధాన్యం ఇస్తోందని చెప్పారు. గ్రామీణ ప్రాంతాల ప్రతిభను ప్రపంచానికి పరిచయం చేసే ప్రయత్నాలకు ప్రభుత్వం ఎల్లప్పుడూ అండగా ఉంటుందని హామీ ఇచ్చారు. భవిష్యత్తులో కూడా యువ కళాకారులకు పూర్తి మద్దతు అందిస్తామని భరోసా ఇచ్చారు.