ఆ భూములను తిరిగి స్వాధీనం చేసుకోండి : ఉత్తమ్

దిశ, వెబ్ డెస్క్ : తెలంగాణ రాష్ట్రవ్యాప్తంగా నీటిపారుదల శాఖ భూములపై ఆక్రమణలను తొలగించేందుకు కఠిన చర్యలు తీసుకోవాలని నీటిపారుదలశాఖ మంత్రి ఉత్తమ్ కుమార్ రెడ్డి ఆదేశించారు. ఆక్రమణకు గురైన భూములను తిరిగి స్వాధీనం చేసుకోవాలని, మళ్లీ ఆక్రమణలు జరగకుండా కంచెలు వేయాలని అధికారులకు ఉత్తర్వులు జారీ చేశారు. గురువారం డాక్టర్ బి.ఆర్. అంబేద్కర్ తెలంగాణ సచివాలయంలో నీటిపారుదల శాఖ, హైడ్రా, రెవెన్యూ, మరియు ఆర్&ఆర్ శాఖల అధికారులతో మంత్రి ఉత్తమ్ కుమార్ రెడ్డి సమీక్ష నిర్వహించారు. వందల కోట్ల రూపాయల విలువైన నీటిపారుదల భూములపై ఆక్రమణలను సహించబోమని స్పష్టం చేశారు.

ఈ భూములను కంచెలతో రక్షించి, వెంటనే తిరిగి స్వాధీనం చేసుకోవాలని ఆదేశించారు. భూముల రక్షణలో ఎదురయ్యే చట్టపరమైన సమస్యలను పరిష్కరించడానికి నీటిపారుదల శాఖ కోసం ప్రత్యేక జీపీని నియమించాలని అడ్వొకేట్ జనరల్‌ను కోరారు.హైదరాబాద్‌లోని వాటర్ అండ్ ల్యాండ్ మేనేజ్‌మెంట్ ట్రైనింగ్ అండ్ రీసెర్చ్ ఇన్‌స్టిట్యూట్ మరియు టీజీఈఆర్‌ఎల్ (తెలంగాణ గ్రౌండ్‌వాటర్ అండ్ ఇరిగేషన్ రీసెర్చ్ లాబొరేటరీ) సమీపంలోని గండిపేట, రాజేంద్రనగర్ ప్రాంతాల్లో 426.30 ఎకరాల భూమిలో 131.31 ఎకరాలు ఆక్రమణకు గురయ్యాయని మంత్రి తెలిపారు. ఇందులో 81.26 ఎకరాలు ఐటీఐఆర్ (ఇన్ఫర్మేషన్ టెక్నాలజీ ఇన్వెస్ట్‌మెంట్ రీజియన్) పరిధిలోనివి కోర్టు వివాదంలో ఉండగా.. మిగిలిన 50.13 ఎకరాలు నేరుగా ఆక్రమణకు గురయ్యాయన్నారు.

ఈ ఆక్రమణలకు సంబంధించి 20 కేసులు జిల్లా కోర్టులో, 2 కేసులు హైకోర్టులో పెండింగ్‌లో ఉన్నాయని మంత్రి వెల్లడించారు. ఈ విలువైన భూములను తిరిగి స్వాధీనం చేసుకోవడానికి నీటిపారుదల, హైడ్రా, రెవెన్యూ, మరియు ఆర్&ఆర్ శాఖల అధికారులు సమన్వయంతో పనిచేయాలని ఆదేశించారు. రాష్ట్రవ్యాప్తంగా నీటిపారుదల శాఖ భూములు, భవనాలు, క్వార్టర్స్ యొక్క పూర్తి జాబితాను తయారు చేయాలని కూడా సూచించారు. అక్రమంగా ఆక్రమించిన నీటిపారుదల శాఖ రెసిడెన్షియల్ క్వార్టర్స్‌ను వెంటనే తిరిగి స్వాధీనం చేసుకోవాలని, దీనిపై పూర్తి నివేదిక సమర్పించాలని అధికారులను ఆదేశించారు.

నీటిపారుదల కాలువలు, నీటిపారుదల ప్రాజెక్టుల పక్కన ఉన్న భూములపై సోలార్ విద్యుత్ కేంద్రాలను ఏర్పాటు చేసే అవకాశాన్ని అధ్యయనం చేయాలని అధికారులను ఆదేశించారు. ఈ విషయం గత కేబినెట్ సమావేశంలో చర్చించబడిందని, ఇలాంటి ప్రాజెక్టుల నుండి ఉత్పత్తి అయ్యే విద్యుత్‌ను రాష్ట్రంలోని పెద్ద లిఫ్ట్ ఇరిగేషన్ ప్రాజెక్టుల కోసం ఉపయోగించవచ్చని కేబినెట్ అభిప్రాయపడిందని ఆయన తెలిపారు. ఈ సమావేశంలో నీటిపారుదల శాఖ ప్రత్యేక ప్రధాన కార్యదర్శి ప్రశాంత్ జీవన్ పాటిల్, హైడ్రా కమిషనర్ ఎ.వి. రంగనాథ్, ఆర్&ఆర్ కమిషనర్ శివకుమార్ నాయుడు, ఈఎన్‌సీ అఫ్జల్ హుస్సేన్, ఈఎన్‌సీ అడ్మిన్ రమేష్ బాబు, వాలంతరి డైరెక్టర్ జనరల్ అనిత, హైడ్రా ఎస్పీ అశోక్ హాజరయ్యారు.