SSREC కంపెనీకి విశ్వకర్మ అవార్డు

దిశ, తెలంగాణ బ్యూరో: గ్రేటర్ హైదరాబాద్ మున్సిపల్ కార్పొరేషన్ పరిధిలో భవన నిర్మాణ వ్యర్థాల సేకరణ, తరలింపు, స్థిరమైన పద్ధతులు, విధానాల్లో చేస్తోన్న విశేష కృషికి గాను ఎస్ఎస్ఆర్ఈసీ (సోమ శ్రీనివాస్​రెడ్డి ఇంజినీర్స్ అండ్ కాంట్రాక్టర్స్) సంస్థకు విశ్వకర్మ అవార్డు లభించింది. కన్ స్ట్రక్షన్ ఇండస్ట్రీ డెవలప్మెంట్ కౌన్సిల్, న్యూ ఢిల్లీ వారి నుంచి ఈ అవార్డును అందుకున్నారు. కన్ స్ట్రక్షన్ ఇండస్ట్రీ డెవలప్మెంట్ కౌన్సిల్ ని ప్లానింగ్ కమిషన్/నీతి అయోగ్ స్థాపించింది. ప్రతిష్ఠాత్మక ఈ అవార్డును శుక్రవారం రాత్రి న్యూ ఢిల్లీలోని డా.అంబేద్కర్ ఇంటర్నేషనల్ సెంటర్ లో అందుకున్నారు. కేంద్ర మంత్రి హర్ష మల్హోత్ర, భవన నిర్మాణ వ్యర్ధాల నిర్వహణ విభాగం డైరెక్టర్ బి.రఘురాంలు అవార్డును ప్రదానం చేశారు. ఈ సందర్భంగా సంస్థ వ్యవస్థాపకులు సోమ శ్రీనివాస్ రెడ్డి మాట్లాడుతూ.. వరుసగా రెండో ఏడాది కూడా భవన నిర్మాణ వ్యర్థాల నిర్వహణ విభాగం నుంచి అవార్డు రావడం సంతోషంగా ఉందన్నారు. ఈ అవార్డు రావడం వెనుక కంపెనీ ఉద్యోగుల కృషి చాలా ఉందని, వారికి ధన్యవాదాలు తెలిపారు. ఈ అవకాశం కల్పించిన తెలంగాణ రాష్ట్ర ప్రభుత్వం, జీహెచ్ఎంసీ అధికారులకు కృతజ్ఞతలు తెలిపారు.