పాఠశాల విద్యాశాఖ క్యాలెండర్ విడుదల..నెలకోసారి నో బ్యాగ్ డే

దిశ,వెబ్‌డెస్క్: తెలంగాణలో ఇకపై ప్రభుత్వ, ప్రైవేట్ పాఠశాలల్లో ప్రతి నెలా నాలుగో శనివారాన్ని నో బ్యాగ్ డేగా పాటించనున్నారు. ఆ రోజు పిల్లలు పుస్తకాల బ్యాగ్ లేకుండా బడులకు హాజరు కావాల్సి ఉంటుంది. ఈ మేరకు కొత్త విద్యా సంవత్సరానికి (2023-24) అకడమిక్ క్యాలెండర్‌ను విద్యాశాఖ కార్యదర్శి వాకాణి కరుణ జూన్ 6న జారీ చేశారు. దీంతో సంవత్సరంలో మొత్తం 10 రోజుల పాటు పిల్లలు సంచులు లేకుండా స్కూల్‌కి వెళ్లనున్నారు. ఆ రోజు పిల్లలతో స్కూళ్లు ఎలాంటి కార్యక్రమాలు నిర్వహించాలన్న దానిపై త్వరలో మార్గదర్శకాలు జారీ చేయనున్నారు.

ఈ సారి విద్యాశాఖ స్కూల్స్ మొదలవక ముందే క్యాలెండర్‌ను విడుదల చేసింది. ఈ విద్యా సంవత్సరం మొత్తం 229 రోజుల పాటు పాఠశాలలు పనిచేయనున్నాయి. టీవీ పాఠాలు యాథావిధిగా ఉంటాయి. త్వరలో టైం టేబుల్ ప్రకటిస్తారు. రోజూ 30 నిమిషాలపాటు పుస్తకపఠనం ఉండేలా చూస్తారు. ప్రతిరోజూ అసెంబ్లీ ముందు లేదా తర్వాత 5 నిమిషాల పాటు యోగా, ధ్యానం ఉండాలని ఆదేశించారు. వారానికి 3 నుంచి 5 పీరియడ్లు ఆటలకు కేటాయించాలని సూచించారు. టెన్త్ క్లాస్ సిలబస్ జనవరి 24 వరకు పూర్తి చేయాలి.

సెలవులు కుదింపు:

ఈ సారి దసరా హాలిడేస్‌ను తగ్గించారు. గతేడాది 14 రోజులున్న సెలవులను ఈ ఏడాది 13 రోజులకు కుదించారు. క్రిస్మస్ సెలవులను 7 నుంచి 5 రోజులకు కుదించారు. దసరా సెలవులు అక్టోబర్ 13 నుంచి 25 వరకు, క్రిస్మస్ హాలిడేస్ డిసెంబర్ 22 నుంచి 26 వరకు ఉంటాయి. ఇక సంక్రాంతి సెలవులు 2024 జనవరి 12 నుంచి 17 వరకు ఇవ్వనున్నారు.