Power Demand: భారీగా తగ్గిన విద్యుత్ డిమాండ్.. 10,500 మెగావాట్లకు చేరిక

దిశ, తెలంగాణ బ్యూరో: రాష్ట్రంలో ఊహించని విధంగా విద్యుత్​డిమాండ్ భారీగా తగ్గింది. నిన్న మొన్నటి వరకు ఎండలు, ఉక్కపోతతో ఇబ్బంది పడ్డ ప్రజానీకానికి ఇటీవల కురిసిన వర్షాలతో కాస్త ఉప శమనం లభించింది. వాతావరణం చల్లబడడంతో ప్రజలు ఏసీలు, ఫ్యాన్లు, కూలర్ల జోలికి వెళ్లకుండా వాటి వినియోగాన్ని తగ్గించుకున్నారు. అటు యాసంగి సీజన్​ముగియడంతో రైతుల పంట అవసరాలకు విద్యుత్​పెద్దగా అవసరం లేకుండా పోయింది. ఈ క్రమంలో మార్చి 20 నుంచి 17,162 మెగావాట్లుగా ఉన్న విద్యుత్​డిమాండ్​ఒక్క సారిగా తగ్గి 10,500 మెగావాట్లకు తగ్గింది. నాలుగు రోజులుగా కేవలం 10,539 మోగావాట్లుగానే నమోదు కావడం గమనార్హం. రాష్ట్రంలోని ఇతర జిల్లాలతో పోలిస్తే హైదరాబాద్‌లోనే ఒకింత విద్యుత్​డిమాండ్​ఎక్కువగా ఉంటోంది. మార్చి 20న జీహెచ్‌ఎంసీ పరిధిలో 3,300 మెగావాట్ల విద్యుత్​డిమాండ్​నమోదు కాగా, తాజాగా 3,900గా నమోదు అయ్యింది. ప్రజలకు నాణ్యమైన విద్యుత్​అందించేలా ఇటు విద్యుత్​శాఖ మంత్రి భట్టి విక్రమార్క, అటు ఉన్నతాధికారులు కృషి చేస్తున్నారు. ఇప్పటికే విద్యుత్​అంతరాయాలను నివారించేందుకు దక్షిణ తెలంగాణ విద్యుత్​పంపిణీ సంస్థ సీఎండీ ముషారఫ్​ఫరూఖీ.. జీహెచ్ఎంసీ పరిధిలోని పాత బస్తీ, సికింద్రాబాద్​తదితర ప్రాంతాల్లో వారం రోజులుగా సమావేశాలు నిర్వహిస్తూ సిబ్బందిని అప్రమత్తం చేస్తున్నారు. అన్ని సర్కిళ్లలోనూ ఫీడర్ల సప్లయ్‌లో ఇబ్బందులు కల్గకుండా సూచనలు చేస్తున్నారు.