మళ్లీ విద్యుత్ ఛార్జీలు పెంచే అవకాశం!

దిశ, తెలంగాణ బ్యూరో: తెలంగాణ విద్యుత్​ నియంత్రణ మండలి ఆధ్వర్యంలో టీజీఎస్‌పిడిసిఎల్​పరిధిలోని వారికి మార్చి నెల 18న సిరిసిల్లలోని పద్మనాభ కళ్యాణమండపంలో పబ్లిక్​హియరింగ్‌ను నిర్వహించనుంది. అదే విధంగా 19వ తేదీన టీజీఎన్‌పిడిసిఎల్​పరిధిలోని వారికి వరంగల్ జిల్లా హన్మకొండ జిల్లా కలెక్టరేట్ కాంప్లెక్స్‌లో నిర్వహించనుంది. ఈ చోట్ల ఇటు విద్యుత్​ అధికారులు, అటు వినియోగదారులు నేరుగా తమ తమ వాదనలను వినిపించుకునే అవకాశం కల్పించింది. పబ్బిక్​హియరింగ్‌కు రాలేని వారు ఆన్​లైన్‌లోనూ తమ వాదనలు వినిపించుకోవచ్చని తెలంగాణ విద్యుత్​ నియంత్రణ మండలి వెల్లడించింది.

కాగా, రాతపూర్వకంగా ఇవ్వాలనుకుంటే మార్చి నెల 3వ తేదీని తుది గడువుగా విధిస్తూ తెలంగాణ విద్యుత్​ నియంత్రణ మండలి తన ప్రకటనలో తెలియజేసింది. కాగా మళ్లీ విద్యుత్​ఛార్జీలు పెంచే అవకాశాలు లేకపోలేదని వినియోగదారులు అంటుండగా, ఈసారి కూడా ప్రభుత్వం వినియోగదారులపై విద్యుత్​ఛార్జీల భారం పడకుండా చూడనుందని చెబుతున్నారు. తెలంగాణ విద్యుత్ నియంత్రణ కమిషన్ నిర్వహించనున్న ఈ సమావేశంలో విద్యుత్​పంపిణీ నష్టాలను 4.75 శాతానికి తగ్గించడం ద్వారా తాము ఒక మైలురాయిని సాధించామని అధికారులు పేర్కొంటున్నారు. మధ్యతరగతి కుటుంబాలకు తక్కువ ఆదాయం ఉంటుందని, ఈ క్రమంలో విద్యుత్ ఛార్జీల పెంపు ఉండదని తెలంగాణ సదరన్ పవర్ డిస్ట్రిబ్యూషన్ కంపెనీ లిమిటెడ్ వర్గాలు చెబుతున్నాయి. అయితే, 300 యూనిట్ల కంటే ఎక్కువ వినియోగించే వినియోగదారులకు స్వల్ప పెంపును అనుమతించాలని ఈఆర్‌సికి విన్నవిస్తామని అధికార వర్గాలు పేర్కొంటున్నట్లు తెలుస్తోంది.