కృషి, పట్టుదల ఉంటే సాధించలేనిది లేదు : ఎస్పీ రాజేష్ చంద్ర

దిశ‌, నిజాంసాగర్ : కృషి, పట్టుదల ఉంటే సాధించలేనిది ఏదీ లేదని ఎస్పీ రాజేష్ చంద్ర అన్నారు. నిజాంసాగర్ పోలీస్ స్టేషన్‌లో మహిళా కానిస్టేబుల్‌గా విధులు నిర్వహిస్తున్న నేనావత్ కస్తూరి ఇటీవల ప్రభుత్వం నిర్వహించిన TSPSC పరీక్షల్లో గ్రేడ్ 1 ఉమెన్స్ డెవలప్మెంట్ & చిల్డ్రన్స్ వెల్ఫేర్ డిపార్ట్మెంట్ ఉద్యోగాన్ని సాధించారు. ఈ సందర్భంగా నేనావత్ కస్తూరిని మంగళవారం జిల్లా పోలీస్ కార్యాలయంలో ఎస్పీ రాజేష్ చంద్ర శాలువా కప్పి పూలమాలలతో,మెమెంటో తో ఘనంగా సన్మానించారు. ఈ సందర్భంగా ఎస్పీ మాట్లాడుతూ.. 2024లో కానిస్టేబుల్‌గా పోలీస్ శాఖలో చేరిన కస్తూరి, విధుల్లో నిబద్ధతతో పాటు అభ్యాసాన్ని కొనసాగించి ఈ విజయాన్ని సాధించారన్నారు. ఆమె కృషి, పట్టుదల యువతకు ఆదర్శంగా నిలిచిందని, భవిష్యత్తులో కూడా తన ప్రతిభతో మంచి పేరు సంపాదించి, ప్రజలకు సేవ చేస్తూ, తనదైన ముద్రను వేసుకోవాలని ఎస్పీ ఆకాంక్షించారు.