నిజామాబాద్‌లో టాస్క్ ఆధ్వర్యంలో మెగా జాబ్ మేళా

దిశ ప్రతినిధి, నిజామాబాద్ : తెలంగాణ రాష్ట్ర ప్రభుత్వం నిజామాబాద్ జిల్లాలోని నిరుద్యోగ యువతీ, యువకుల ఉజ్వల భవిష్యత్తు కోసం నేటి పోటీ ప్రపంచంలో విజయం సాధించడానికి అవసరమైన నైపుణ్యాలను అందించడానికి తెలంగాణ అకాడమీ ఫర్ స్కిల్ అండ్ నాలెడ్జ్ (టాస్క్) కృషి చేస్తోంది. ఈ ప్రయత్నంలో భాగంగానే తెలంగాణ అకాడమీ ఫర్ స్కిల్ అండ్ నాలెడ్జ్ ప్రాంతీయ కేంద్రాన్ని నిజామాబాద్ నగరంలోని ఐ టీ టవర్స్‌లో ఏర్పాటు చేశారు. తెలంగాణ అకాడమీ ఫర్ స్కిల్ అండ్ నాలెడ్జ్ (టాస్క్) ఆధ్వర్యంలో ఈనెల 25న (బుధవారం) ఉదయం 09:30 గంటలకు నిజామాబాద్ లోని కలెక్టరేట్ పక్కనగల ఐటీ టవర్స్‌లోని టాస్క్ ప్రాంతీయ కేంద్రంలో మెగా జాబ్ మేళా నిర్వహించబడుతుందని ప్రాంతీయ కేంద్రాల రాష్ట్ర అధికారి సవీన్ రెడ్డి ఒక ప్రకటనలో తెలిపారు.

ఈ మేళా ద్వారా డిప్లొమా, B.E/ B.Tech, డిగ్రీ, పోస్ట్ గ్రాడ్యుయేషన్ పూర్తి చేసిన యువతకు వివిధ ప్రముఖ కంపెనీల్లో ఉద్యోగావకాశాలు లభించనున్నట్లు ఆయన పేర్కొన్నారు. డీ ఎస్ టెక్నాలజీస్, బయో టెక్నాలజీస్, స్కౌట్ బెట్టర్, ధరణి జియో స్పాటియల్ టెక్నాలజీస్, డెవ్లాట్స్ వంటి ప్రముఖ కంపెనీలు ఈ జాబ్ మేళాలో పాల్గొననున్నట్లు సవీన్ రెడ్డి తెలిపారు. ఈ సందర్భంగా టాస్క్ సీఈఓ శ్రీకాంత్ సిన్హా మాట్లాడుతూ.. ఈ జాబ్ మేళా ద్వారా యువతకు మంచి కంపెనీల్లో ఉద్యోగ అవకాశాలు లభిస్తాయన్నారు. పరిశ్రమ అవసరాలకు తగిన నైపుణ్యాలతో యువతను తీర్చిదిద్దడమే టాస్క్ ప్రధాన లక్ష్యమని ఆయన తెలిపారు. నిజామాబాద్ నగరంతో పాటు పరిసర ప్రాంతాల విద్యార్థులు, నిరుద్యోగులు ఈ అవకాశాన్ని వినియోగించుకోవాలని కోరారు. ఎంపిక ప్రక్రియలో విజయవంతం కావాలంటే జాబ్ మేళాలో ఆత్మవిశ్వాసంతో పాల్గొనాలని రిలేషన్‌షిప్ మేనేజర్ శ్రీనాథ్ రెడ్డి సూచించారు. అభ్యర్థులు ఎక్కువ కాపీల రెజ్యూమ్స్ తీసుకురావాలని సూచించారు.