చీపురు అమ్మే చేతుల్లో.. బంగారు లాంటి నిజాయితీ

దిశ, తాడ్వాయి : నేటి సమాజంలో స్వార్థం,అవినీతి రాజ్యమేలుతున్న తరుణంలో.. రెక్కాడితే గానీ డొక్కాడని ఒక సామాన్య మహిళ అసాధారణమైన ఆత్మాభిమానాన్ని చాటుకుంది. కోట్లు ఉన్నా దక్కని గొప్ప సంస్కారాన్ని ప్రదర్శించి ఎందరికో విరాళాలు అందించే ఓ బీజేపీ నాయకుడితో పాటు అందరినీ ఆశ్చర్యపరిచింది.​ వివరాల్లోకి వెళ్తే.. రోడ్డు పక్కన చీపురు పుల్లలు ఏరి వాటిని అమ్మి జీవనం సాగించే ఒక వృద్ధురాలి కి కామారెడ్డి జిల్లాకు చెందిన బీజేపీ రాష్ట్ర నాయకుడు పైడి ఎల్లారెడ్డి రోడ్డు మార్గం గుండా వెళ్తున్న సందర్భంగా ఆశ్చర్యమైన ఘటన ఎదురైంది. ఓ వృద్ధురాలు ఆమె పడుతున్న కష్టాన్ని చూసి చలించిన ఆయన, సహాయం చేయాలనే ఉద్దేశంతో ఒక చీపురు కట్ట ధర అడిగారు. ఆమె రూ.50 అని చెప్పగా, వెంటనే ఆయన నోటును ఆమెకు అందించి, చీపురు తీసుకోకుండానే వెనుతిరగబోయారు.

​వెంటనే ఆ వృద్ధురాలు అభ్యంతరం వ్యక్తం చేసింది. తన కష్టార్జితం కానీ డబ్బును తీసుకోవడానికి ఆమె మనసు అంగీకరించలేదు. అయ్యా.. మీరు పెద్దోళ్ళు. కానీ వస్తువు తీసుకోకుండా డబ్బులు ఇస్తే నా నియత్తు (నిజాయితీ) ఉండదు. నా వస్తువు తీసుకోలేదు కాబట్టి ఈ డబ్బు నాకెందుకు? అంటూ సున్నితంగా ఆ నోటును తిరిగి ఇచ్చేసింది.​ ఎందరికో విరాళాలు ఇచ్చే అలవాటున్న నాయకుడికి, ఒక పేదరాలు చూపిన ఈ నిజాయితీ కళ్లు తెరిపించేలా చేసింది. దీంతో ఆమెలోని నిజాయితీకి, ముగ్ధుడైన ఆ బీజేపీ నాయకుడు ఈ దృశ్యాన్ని సోషల్ మీడియాలో పంచుకున్నారు. ప్రస్తుతం ఈ వీడియో నెట్టింట వైరల్‌గా మారింది. కాయకష్టాన్ని నమ్ముకున్న ఈ పేద తల్లే నిజమైన ధనవంతురాలు అంటూ వేల సంఖ్యలో నెటిజన్లు ఆమెపై ప్రశంసలు కురిపిస్తున్నారు.ఆత్మాభిమానం ముందు అపారమైన సంపద కూడా చిన్నబోతుందని ఈ ఘటన మరోసారి నిరూపించింది.