మానవత్వం చాటుకున్న మాజీ మంత్రి షబ్బీర్ అలీ

దిశ, బిక్కనూరు : బైక్ పై వెళ్తున్న ఓ వ్యక్తి అకస్మాత్తుగా ఫిట్స్ వచ్చి పడిపోగా.. సమయానికి అతడిని ఆసుపత్రికి తరలించి చికిత్స అందించి మానవత్వాన్ని చాటుకున్నారు కాంగ్రెస్ మాజీ మంత్రి షబ్బీర్ అలీ. వివరాల్లోకి వెళితే.. దోమకొండ మండలం మాందాపూర్ లో ఓ కార్యక్రమంలో పాల్గొనేందుకు కాన్వాయ్ తో మంగళవారం కామారెడ్డి నుంచి బయలుదేరారు మాజీ మంత్రి షబ్బీర్ అలీ. బిక్కనూరు మండలం జంగంపల్లి వద్దకు రాగానే ద్విచక్ర వాహనంపై వెళ్తున్న ఓ వ్యక్తికి ఫిట్స్ రావడంతో రోడ్డుపైనే పడిపోయాడు. అదే సమయంలో అటుగా వెళ్తున్న షబ్బీర్ అలీ తన కాన్వాయిని ఆపి సదరు వ్యక్తి వద్దకు వెళ్తాడు. అనంతరం అతడిని సమీపంలోని ఓ ప్రైవేట్ ఆస్పత్రి తీసుకెళ్లి చికిత్స చేయించారు. వైద్యానికి అయ్యే డబ్బు బాధితుడికి అందజేసి అక్కడి నుంచి మాందాపూర్ కార్యక్రమానికి బయలుదేరారు.