నేటి నుంచి యాదగిరిగుట్టలో బ్రహ్మోత్సవాలు

దిశ, యాదాద్రి భువనగిరి ప్రతినిధి : వేదఘోషాల మాధుర్యం, గంటానాదాల ఘనత, “ఓం లక్ష్మీ నరసింహాయ నమః” అనే నామస్మరణల నడుమ యాదాద్రి పుణ్యక్షేత్రం మరోసారి దివ్య వైభవానికి సాక్ష్యమివ్వబోతోంది. శరణాగతులకు శరణ్యం, భక్తులకు అభయదాత అయిన శ్రీ లక్ష్మీ నరసింహ స్వామి వారి వార్షిక బ్రహ్మోత్సవాలు నేటి నుంచి ఘనంగా ప్రారంభం కానున్నాయి. గిరిశిఖరంపై వెలసిన ఈ స్వయంభూ క్షేత్రం యుగయుగాలుగా భక్తుల ఆధ్యాత్మిక ఆశ్రయం. యాద మహర్షి తపస్సుకు ప్రత్యక్షమైన నరసింహ స్వరూపం, ఈ ప్రాంతాన్ని క్షేత్రరాజంగా నిలిపింది. స్వామివారి సన్నిధిలో నిలబడిన ప్రతి భక్తుని హృదయంలో భయం తొలగి భక్తి పరవశం కలుగుతుందనే విశ్వాసం తరతరాలుగా కొనసాగుతోంది.

బ్రహ్మోత్సవాలు అంటే భగవంతుని వైభవాన్ని బ్రహ్మదేవుడే ఆరాధించిన దివ్యోత్సవాల స్ఫూర్తి. అదే ఆధ్యాత్మిక భావంతో యాదాద్రిలో జరగనున్న ఈ మహోత్సవాలు భక్తి జ్వాలను మరింత ప్రగాఢం చేయనున్నాయి. స్వామివారి ప్రత్యేక అలంకారాలు, వాహనసేవలు, వేదపారాయణాలు, సాంస్కృతిక కార్యక్రమాలు క్షేత్రాన్ని వైకుంఠ వాతావరణంగా మలచనున్నాయి. రాత్రివేళల్లో విద్యుత్ దీపాలతో మెరిసే ఆలయ ప్రాంగణం దివ్య కాంతులతో కళకళలాడనుండగా, వేలాది మంది భక్తులు స్వామివారి కృపాకటాక్షం కోసం తరలిరానున్నారు. విశ్వావసు నామ సంవత్సర ఫాల్గుణ శుద్ధ పాడ్యమి బుధవారం నుంచి ద్వాదశి శనివారం వరకు ఈ వేడుకలు అత్యంత వైభవంగా జరగనున్నాయి. 11 రోజుల పాటు జరిగే ఈ ఉత్సవాల్లో స్వామి వారు వివిధ అలంకారాల్లో భక్తులకు దర్శనమివ్వనున్నారు.

ఉత్సవాల శ్రీకారం – ధ్వజారోహణ మహిమాన్వితం..

ఫిబ్రవరి 18న విష్వక్సేన ఆరాధన, స్వస్తివాచనం, రక్షాబంధనంతో బ్రహ్మోత్సవాలు ప్రారంభమవుతాయి. ఫిబ్రవరి 19న అగ్ని ప్రతిష్ఠ అనంతరం ఉదయం 11 గంటలకు ధ్వజారోహణం జరుగుతుంది. ధ్వజస్తంభంపై గరుడ చిహ్నం ఎగురవేయడంతో ఉత్సవాలకు అధికారిక శ్రీకారం చుడతారు.

దశావతారాల అలంకార వైభవం...

ఫిబ్రవరి 20 నుంచి 26 వరకు స్వామివారు విభిన్న అవతారాలలో దర్శనమివ్వనున్నారు. మత్స్యావతారం, వటపత్రశాయి, శ్రీకృష్ణుడు (మురళీ కృష్ణుడు), గోవర్ధనగిరిధారి, జగన్మోహిని, శ్రీరామ, మహావిష్ణు రూపాలలో అలంకరించబడి భక్తులకు దివ్య దర్శనం కల్పించనున్నారు. ప్రతి రాత్రి శేష, హంస, పొన్న, సింహ, అశ్వ, గజ, గరుడ వాహనసేవలు భక్తి పరవశాన్ని రెట్టింపు చేయనున్నాయి.

ఫిబ్రవరి 24 – ఎదుర్కోలు మహోత్సవం...

మంగళవారం (24-02-2026) రాత్రి 8.45 గంటలకు స్వామివారి ఎదుర్కోలు మహోత్సవం నిర్వహించనున్నారు. అశ్వ వాహనసేవ అనంతరం జరిగే ఈ వేడుక ఉత్సవాల్లో ప్రత్యేక ఘట్టంగా నిలుస్తుంది.

ఫిబ్రవరి 25 – తిరుకల్యాణ మహోత్సవ వైభవం...

బుధవారం (25-02-2026) రాత్రి 9.30 గంటలకు శ్రీ లక్ష్మీ నరసింహ స్వామివారి తిరుకల్యాణ మహోత్సవం భక్తి వైభవంగా జరగనుంది. లక్ష్మీదేవితో స్వామివారి కల్యాణం దర్శించేందుకు వేలాది మంది భక్తులు తరలిరానున్నారు.

ఫిబ్రవరి 26 – దివ్య విమాన రథోత్సవం....

గురువారం (26-02-2026) రాత్రి 7.30 గంటలకు దివ్య విమాన రథోత్సవం నిర్వహించనున్నారు. విద్యుత్ దీపాలతో అలంకరించిన రథంపై స్వామివారి విహారం గిరిమేడల్ని నరసింహ నామంతో మార్మోగించనుంది.

మహాసమాప్తి వైభవం

ఫిబ్రవరి 27న మహాపూర్ణాహుతి, చక్రతీర్థం, పుష్పయాగం నిర్వహించబడతాయి. ఫిబ్రవరి 28న అష్టోత్తర శతఘటాభిషేకం, శృంగార డోలోత్సవంతో బ్రహ్మోత్సవాలు ఘనంగా ముగియనున్నాయి.

అలంకార సేవలు - వాహన సేవలు:

ఉత్సవాల సమయంలో ప్రతిరోజూ ఉదయం స్వామి వారికి వివిధ అలంకారాలు, రాత్రి వేళ వాహన సేవలు నిర్వహిస్తారు:

* మత్స్యావతారం, వటపత్రశాయి, మురళీకృష్ణ, గోవర్ధనగిరిధారి, జగన్మోహిని, శ్రీరామ మరియు మహావిష్ణు అలంకారాల్లో స్వామి వారు దర్శనమిస్తారు.

* శేష, హంస, పొన్న, సింహ, అశ్వ, హనుమంత, గజ మరియు గరుడ వాహనాలపై స్వామి వారి ఊరేగింపు జరుగుతుంది.

భక్తులకు ప్రత్యేక సూచనలు:

* కళ్యాణోత్సవం: కళ్యాణంలో పాల్గొనే భక్తులు రూ. 3,000/- చెల్లించి, సంప్రదాయ దుస్తుల్లో హాజరుకావాల్సి ఉంటుంది.

* సేవల రద్దు: బ్రహ్మోత్సవాల దృష్ట్యా ఫిబ్రవరి 18 నుండి 28 వరకు సుదర్శన నారసింహ హోమం, నిత్య కళ్యాణం వంటి ఆర్జిత సేవలు రద్దు చేయబడ్డాయి. ఫిబ్రవరి 27, 28 తేదీలలో ఉదయం వేళ భక్తులచే జరిపించబడే అభిషేకాలు, అర్చనలు ఉండవు.