రేపు ఆరుట్ల ‘టీపీఎస్’కు మంత్రి అజారుద్దీన్

దిశ మంచాల: ఆరుట్ల తెలంగాణ పబ్లిక్ స్కూల్ (టీపీఎస్) శనివారం ఒక అరుదైన, ఉత్సాహభరితమైన కార్యక్రమానికి వేదిక కానుంది. రాష్ట్ర మైనార్టీ సంక్షేమ‌, ప్రభుత్వ రంగ సంస్థల (పబ్లిక్ ఎంటర్‌ప్రైజెస్) శాఖ మంత్రి, భారత క్రికెట్ జట్టు మాజీ కెప్టెన్ మహ్మద్ అజారుద్దీన్ రేపు (శనివారం) ఈ పాఠశాలను సందర్శించనున్నారు. ఉదయం 11 గంటల నుంచి మధ్యాహ్నం 2 గంటల వరకు సుమారు మూడు గంటల పాటు ఆయన విద్యార్థులతోనే గడపనున్నారు అని ప్రిన్సిపల్ గిరిధర్ గౌడ్ తెలిపారు. పిల్లలతో ‘అజార్’ క్రికెట్ ముచ్చట్లు ప్రపంచ క్రికెట్ వేదికలపై తన అద్భుతమైన మణికట్టు షాట్లతో భారత జట్టుకు ఎన్నో చిరస్మరణీయ విజయాలు అందించిన అజారుద్దీన్.. రేపు విద్యార్థులతో ముఖాముఖి నిర్వహించనున్నారు. క్రీడల్లో రాణించేందుకు అవసరమైన మెలకువలు, క్రమశిక్షణ, ఫిట్‌నెస్, జట్టు స్ఫూర్తి, నాయకత్వ లక్షణాలపై వారికి దిశానిర్దేశం చేయనున్నారు. అనంతరం విద్యార్థులతో కలిసి మైదానంలో కాసేపు బ్యాట్ పట్టి సందడి చేయనున్నారు. ఒక దిగ్గజ క్రికెటర్‌తో కలిసి ఆడే అరుదైన అవకాశం లభించనుండటంతో విద్యార్థుల్లో ఇప్పటికే భారీ అంచనాలు నెలకొన్నాయి.

వసతులపై క్షేత్రస్థాయి పరిశీలన

పర్యటనలో భాగంగా పాఠశాలలోని తరగతి గదులు, డైనింగ్ హాల్స్, హాస్టల్ వసతులు, క్రీడా మైదానాలను మంత్రి స్వయంగా పరిశీలించనున్నారు. మధ్యాహ్న భోజన నాణ్యత, తాగునీటి సౌకర్యాలు, పరిశుభ్రత ప్రమాణాలపై అధికారులతో క్షేత్రస్థాయి సమీక్ష నిర్వహించనున్నారు. చదువుతో పాటు క్రీడల్లోనూ రాణిస్తే జీవితంలో ఉన్నత శిఖరాలను చేరుకోవచ్చని విద్యార్థుల్లో ఆయన ప్రేరణ నింపనున్నారు. మంత్రి పర్యటన నేపథ్యంలో ఆరుట్ల టీపీఎస్ అధికారులు, జిల్లా యంత్రాంగం ఇప్పటికే అన్ని ఏర్పాట్లను పూర్తి చేసింది.