దుబ్బ రూప కుటుంబానికి అండగా ఉంటాం.. ఏఐసీసీ ఇంచార్జ్ మీనాక్షి, టీపీసీసీ చీఫ్ భరోసా

దిశ, డైనమిక్ బ్యూరో: ఇటీవల ఆకస్మికంగా మృతి చెందిన రాష్ట్ర మహిళా కాంగ్రెస్ ఉపాధ్యక్షురాలు దుబ్బ రూప కుటుంబానికి కాంగ్రెస్ పార్టీ అండగా ఉంటుందని ఏఐసీసీ ఇంచార్జ్ మీనాక్షి నటరాజన్, టీపీసీసీ అధ్యక్షుడు మహేష్ కుమార్ గౌడ్ లు భరోసా ఇచ్చారు. ఈ మేరకు ఇవాళ (మంగళవారం) గాంధీ భవన్‌లో మహిళ కాంగ్రెస్ అధ్యక్షురాలు సునీతా రావు ఆధ్వర్యంలో దుబ్బ రూప కూతురు సాత్విక కాంగ్రెస్ నాయకులను కలిశారు. ఈ సందర్భంగా వారు ఆమెతో మాట్లాడి కుటుంబ పరిస్థితులు అడిగి తెలుసుకున్నారు. కాగా, నల్గొండ జిల్లాకు చెందిన తెలంగాణ రాష్ట్ర మహిళా కాంగ్రెస్ ఉపాధ్యక్షురాలు దుబ్బ రూప గుండెపోటుతో మరణించారు. ఆమె నవంబర్ 7 వ తేదీన హైదరాబాద్‌లోని ప్రైవేట్ ఆసుపత్రిలో చికిత్స పొందుతూ కన్నుమూశారు. ఈ వార్త తెలియగానే అనేకమంది రాజకీయ నాయకులు, పార్టీ నాయకులు ఆమె కుటుంబ సభ్యులను పరామర్శించి, సంతాపం తెలిపారు. జూబ్లీహిల్స్ ఉప ఎన్నికల సమయంలో ప్రచారంలో ఆమె యాక్టీవ్‌గా ఉండటాన్ని నేతలు గుర్తుచేసుకున్నారు.