గ్రేటర్లోనే నెంబర్ వన్ నియోజకవర్గంగా కూకట్పల్లి: ఎమ్మెల్యే మాధవరం
దిశ, కూకట్పల్లి: గ్రేటర్లోనే నెంబర్ వన్ నియోజకవర్గంగా కూకట్పల్లిని అభివృద్ధి చేసేందుకు ప్రణాళిక బద్దంగా పని చేస్తున్నామని ఎమ్మెల్యే మాధవరం కృష్ణారావు అన్నారు. నియోజకవర్గం పరిధి ఫతేనగర్ డివిజన్ పరిధిలో రూ. 3.9 కోట్ల వ్యయంతో చేపడుతున్న నాలా రిటైనింగ్ వాల్ నిర్మాణ పనులను ఎమ్మెల్యే గురువారం స్థానిక కార్పొరేటర్ పండాల సతీష్ గౌడ్తో కలిసి ప్రారంభించారు.
ఈ సందర్భంగా ఆయన మాట్లాడుతూ కూకట్పల్లి నియోజకవర్గంలో అభివృద్ధి కార్యక్రమాలలో ఎటువంటి రాజీ లేకుండా పని చేస్తున్నామని అన్నారు. రానున్న వర్షా కాలాన్ని దృష్టిలో ఉంచుకుని నాలా పరివాహక ప్రాంత ప్రజలకు ఇబ్బంది కలగకుండా, వరద సమస్యను పరిష్కరించేందుకు నాలా రిటైనింగ్ వాల్ నిర్మాణ పనులను చేపడుతున్నామని అన్నారు.
నియోజకవర్గం పరిధికి చెందిన ప్రతి డివిజన్లోని ప్రతి కాలనీలో ప్రజలకు కనీస వసతులు కల్పించేందుకు అన్ని చర్యలు తీసుకుంటున్నామని అన్నారు. తెలంగాణ ప్రభుత్వం సీఎం కేసీఆర్ నాయకత్వంలో అభివృద్ధియే ప్రధాన ఎజెండాగా పని చేస్తుందని అన్నారు. ఈ కార్యక్రమంలో ఈఈ సత్యనారాయణ, డీఈ శ్రీదేవి, ఏఈ పవన్, డివిజన్ అధ్యక్షుడు కంచి భిక్షపతి తదితరులు పాల్గొన్నారు.
