గ్యాస్ సిలిండర్ పేలి మహిళ మృతి

దిశ, గద్వాల క్రైమ్: వంట చేస్తూ గ్యాస్ సిలిండర్ పేలి ఓ మహిళ మృతిచెందిన సంఘటన ఆదివారం గద్వాల మండలంలో చోటు చేసుకుంది. స్థానికుల కథనం మేరకు.. గద్వాల మండలం కొండపల్లి గ్రామానికి చెందిన కోడుముక్కు చిన్న రామన్న- ఆయన భార్య కోడి ముక్కు కిష్టమ్మ (65) గుడిసెలో నివాసం ఉంటున్నారు. ఆదివారం మ. 12 గంటల సమయంలో వంట చేస్తుండగా ఒక్కసారిగా గ్యాస్ సిలిండర్ పేలింది. ఈ ఘటనలో కిష్టమ్మ అక్కడికక్కడే మృతిచెందారు. ఇంట్లో ఉన్న చిన్న రామన్నకు స్వల్ప గాయాలయ్యాయి. భారీ పేలుడు శబ్దం రావడంతో గ్రామస్తులంతా ఆ ఇంటి వద్దకు పరుగులు తీశారు. విషయం తెలుసుకున్న గద్వాల రూరల్ ఎస్సై ఆనందం పోలీస్ సిబ్బందితో గ్రామానికి వెళ్లారు. జరిగిన సంఘటనపై గ్రామస్తుల ద్వారా అడిగి తెలుసుకున్నారు. మృతదేహాన్ని పోస్టుమార్టం నిమిత్తం గద్వాల ప్రభుత్వ ఆసుపత్రికి తరలించేందుకు చర్యలు చేపడుతున్నారు.