లోక్ సభలో ఎంపీ అడిగిన ప్రశ్నకు సమాధానమిచ్చిన కేంద్ర మంత్రి

దిశ, ఖమ్మంబ్యూరో: దేశ పర్యాటక ప్రాంతాల్లో అభివృద్ధిని ప్రోత్సహించడానికి కేంద్ర ప్రభుత్వం ఎలాంటి చర్యలు చేపడుతోందని.. ఖమ్మం పార్లమెంట్ సభ్యులు రామసహాయం రఘురాం రెడ్డి సోమవారం లోక్ సభలో ప్రశ్నించారు. దేశంలోని ప్రధాన పర్యాటక ప్రాంతాలైన హిల్ స్టేషన్లు, తీర ప్రాంతాలు, పుణ్యక్షేత్రాలపై ఎలాంటి దృష్టి పెట్టారో వివరాలు తెలపాల్సిందిగా కోరారు. దీనికి కేంద్ర పర్యాటక శాఖ మంత్రి గజేంద్ర సింగ్ షెకావత్ లిఖిత పూర్వక సమాధానం ఇచ్చారు. ​మౌలిక సదుపాయాల కల్పన, నీటి కొరత వంటి సమస్యల నివారణ బాధ్యత ప్రధానంగా ఆయా రాష్ట్ర ప్రభుత్వాలు, కేంద్రపాలిత ప్రాంతాల యంత్రాంగాలదేనని మంత్రి స్పష్టం చేశారు.

తక్కువ ప్రసిద్ధి చెందిన ప్రాంతాలపై..

ప్రాజెక్టు ప్రతిపాదనలు సమర్పించే సమయంలో పర్యాటక ప్రాంతాల సామర్థ్యాన్ని అంచనా వేయాలని, రాష్ట్రాలను కేంద్రం ప్రోత్సహిస్తోందని, దీనికోసం ప్రత్యేక మాస్టర్ ప్లాన్ సిద్ధం చేసినట్లు తెలిపారు. ​స్వచ్ఛంద వర్గీకరణ పథకం కింద 1 నుండి 5-స్టార్ హోటళ్లు మురుగునీటి శుద్ధి మొక్కలు (STP), వర్షపు నీటి సేకరణ, వ్యర్థాల నిర్వహణ, వాయు-నీటి కాలుష్య నివారణ వంటి పర్యావరణహిత పద్ధతులు పాటించేలా మార్గదర్శకాలు జారీ చేశామని పేర్కొన్నారు.​ పర్యాటక వ్యాపార రంగంలో పర్యావరణ బాధ్యతను పెంపొందించడానికి 'ట్రావెల్ ఫర్ లైఫ్' కార్యక్రమాన్ని ప్రారంభించినట్లు మంత్రి వెల్లడించారు. తక్కువ ప్రసిద్ధి చెందిన ప్రాంతాలపై అవగాహన కల్పించేందుకు 'దేఖో అప్నా దేశ్' చొరవను క్రియాశీలకంగా అమలు చేస్తున్నట్లు తెలిపారు. స్వదేశ్ దర్శన్, స్వదేశ్ దర్శన్ 2.0, సీబీడీడీ, ప్రసాద్ వంటి ప్రతిష్టాత్మక పథకాల ద్వారా పర్యాటక ప్రాంతాల్లో మౌలిక వసతులు, భద్రత, పారిశుద్ధ్యం మెరుగుపరచడానికి కేంద్రం ఆర్థిక సహాయం అందిస్తోందని మంత్రి వివరించారు.