మామిడిగుండాల సీలింగ్ భూములకు పట్టాలు ఇవ్వాలి.. అఖిలపక్ష నాయకుల డిమాండ్

దిశ, ఇల్లెందు: దశాబ్దాలుగా సాగు చేసుకుంటున్న గిరిజన, ఆదివాసీ రైతులకు మామిడిగుండాల ప్రాంతంలోని సీలింగ్ భూములకు పట్టాలు మంజూరు చేయాలని అఖిలపక్ష నాయకులు ప్రభుత్వాన్ని, అధికారులను డిమాండ్ చేశారు. ఈ సందర్భంగా చంద్ర కృష్ణమూర్తి విజ్ఞాన భవన్‌లో ఏర్పాటు చేసిన విలేకరుల సమావేశంలో మాజీ ఎమ్మెల్యే గుమ్మడి నర్సయ్య మాట్లాడుతూ, నెమరుగమ్ముల రాఘవేంద్రరావుకు చెందిన సుమారు 4,000 ఎకరాల సీలింగ్ భూముల్లో ఇప్పటికే 2,500 ఎకరాలను ఆ ప్రాంతంలో సాగు చేస్తున్న రైతులకు కేటాయించారని తెలిపారు. మిగిలిన భూములను కూడా ప్రభుత్వ నిబంధనల ప్రకారం పరిశీలించి, అర్హులైన సాగుదారులకు పట్టాలు మంజూరు చేయాలని కోరారు. ఈ సమస్య పరిష్కారం కోసం అనేక సంవత్సరాలుగా రైతులు, ప్రజా సంఘాలు పోరాటం చేస్తున్నప్పటికీ ఇప్పటికీ పూర్తి స్థాయిలో న్యాయం జరగలేదని ఆయన ఆవేదన వ్యక్తం చేశారు. భూములకు స్పష్టమైన హద్దులు లేకపోవడంతో ఈ ప్రాంతానికి సంబంధం లేని కొందరు వ్యక్తులు భూములపై హక్కులు తమవేనంటూ రైతులను బెదిరిస్తున్నారని ఆరోపించారు. ప్రభుత్వం తక్షణమే జోక్యం చేసుకుని రైతులకు కేటాయించిన భూములకు సరిహద్దులు నిర్ధారించి, హక్కుదారు పట్టాలు అందజేయాలని డిమాండ్ చేశారు. ఈ అంశంపై దశలవారీగా ఆందోళనలు చేపడతామని, స్థానిక తహసీల్దార్, ఆర్డీవో, జిల్లా కలెక్టర్‌లను కలిసి వినతిపత్రాలు సమర్పిస్తామని తెలిపారు. ఈ సమావేశంలో అఖిలపక్ష నాయకులు నబీ భాస్కర్, లక్ష్మయ్య, సంజీవ్, సిలివేరి సత్యనారాయణ, వీరభద్రం, కృష్ణ, రాంబాబు, ఆర్.ఎస్. బోస్ తదితరులు పాల్గొన్నారు.