ఖమ్మం అభివృద్ధికి కేంద్రమే అండ..!

దిశ, ఖమ్మంటౌన్: గడిచిన 12 ఏళ్లలో ప్రధాని మోదీ నాయకత్వంలో దేశం అన్ని రంగాల్లో సుభిక్షంగా వర్ధిల్లుతోందని, ప్రపంచ దేశాల ముందు భారతదేశం అత్యంత గౌరవప్రదమైన శిఖరాగ్ర స్థాయికి చేరుకుందని బీజేపీ రాష్ట్ర కోశాధికారి దేవకి వాసుదేవరావు ఉద్ఘాటించారు. ప్రధాని నరేంద్ర మోదీ పదవీ బాధ్యతలు చేపట్టి విజయవంతంగా 12 సంవత్సరాలు పూర్తి చేసుకున్న సందర్భంగా శనివారం స్థానిక కిన్నెర రెస్టారెంట్లో బీజేపీ జిల్లా అధ్యక్షులు నెల్లూరి కోటేశ్వరరావు అధ్యక్షతన ఏర్పాటు చేసిన మీడియా సమావేశంలో పార్టీ రాష్ట్ర కోశాధికారి దేవకి వాసుదేవరావు ముఖ్య అతిథిగా పాల్గొని ప్రసంగించారు. ఈ సందర్భంగా వారు మాట్లాడుతూ, రాష్ట్రంలో రాజకీయ పరిస్థితులు ఎలా ఉన్నప్పటికీ, ఖమ్మం జిల్లా సర్వతోముఖాభివృద్ధికి కేంద్ర ప్రభుత్వం వేల కోట్ల రూపాయల నిధులను పారదర్శకంగా మంజూరు చేస్తోందని నాయకులు స్పష్టం చేశారు. కేవలం మాటలకే పరిమితం కాకుండా, సంక్షేమం మరియు మౌలిక వసతుల కల్పనలో కేంద్రం అందిస్తున్న సహకారాన్ని గణాంకాలతో సహా వివరించి ప్రతిపక్షాలకు దీటైన సమాధానం ఇచ్చారు. వివిధ శాఖల ద్వారా జిల్లాలో జరుగుతున్న ప్రగతిని ఈ సందర్భంగా కళ్లకు కట్టినట్లు వివరించారు.

మహిళలు, బడుగు వర్గాల అభ్యున్నతే లక్ష్యంగా సంక్షేమ పర్వం

జిల్లాలో మహిళలు, శిశువులు, వికలాంగుల సాధికారత కోసం కేంద్రం పెద్దపీట వేసింది. సప్లిమెంటరీ న్యూట్రిషన్ ప్రోగ్రామ్ ద్వారా 52,243 మందికి పౌష్టికాహారం అందించగా, ఆరోగ్య లక్ష్మి పథకం ద్వారా 12,291 మంది గర్భిణీలు, బాలింతలకు లబ్ధి చేకూర్చారు. సఖి కేంద్రం ద్వారా వందల మందికి కౌన్సెలింగ్, పునరావాసం కల్పించారు. మిషన్ శక్తి, వాత్సల్య, బేటీ బచావో-బేటీ పఢావో వంటి పథకాల ద్వారా మహిళలకు రక్షణ కల్పిస్తున్నారు. పేదల ఆకలి తీర్చేందుకు జాతీయ ఆహార భద్రతా చట్టం కింద జిల్లాలో 4.68 లక్షల కార్డుదారులకు అండగా నిలుస్తూ, సన్నబియ్యం పంపిణీని విజయవంతంగా అమలు చేస్తున్నారు. ప్రధానమంత్రి ఉజ్వల యోజన కింద 70 వేలకు పైగా దారిద్య్ర రేఖకు దిగువన ఉన్న మహిళలకు ఉచిత గ్యాస్ కనెక్షన్లు అందించారు. గ్రామీణాభివృద్ధి సంస్థ ద్వారా ఉపాధి హామీ వేతనాన్ని రూ. 307 కు పెంచి, ఏకంగా 30.47 లక్షల పనిదినాలు కల్పించడం ద్వారా పేదల ఖాతాల్లో రూ. 111.04 కోట్లు జమ చేశారు. జాతీయ సామాజిక సహాయ కార్యక్రమం కింద లక్షలాది మంది వృద్ధులు, వికలాంగులకు పింఛన్లు అందిస్తూ కేంద్రం తన సామాజిక బాధ్యతను చాటుకుంది.

రైతే రాజు.. వ్యవసాయం, ఉద్యానవనాలకు మహర్దశ

అన్నదాతల ఆర్థిక స్వావలంబన కోసం పీఎం కిసాన్ పథకం కింద జిల్లాలోని 1.43 లక్షల మంది రైతుల ఖాతాల్లోకి దళారుల ప్రమేయం లేకుండా రూ. 57.36 కోట్లు నేరుగా జమ అయ్యాయి. భూసార పరీక్షల కింద పది వేల మందికి కార్డులు పంపిణీ చేసి శాస్త్రీయ వ్యవసాయాన్ని ప్రోత్సహిస్తున్నారు. ఆయిల్ పామ్ మిషన్ కింద 9,519 ఎకరాల్లో తోటల పెంపకం పూర్తి చేసి రూ. 21.89 కోట్ల సబ్సిడీని రైతుల ఖాతాల్లోకి చేర్చారు. మైక్రో ఇరిగేషన్, పశుసంవర్ధక శాఖ ద్వారా ఎన్ఎల్ఎం పథకంలో భాగంగా కోట్లాది రూపాయల సబ్సిడీతో గొర్రెలు, పౌల్ట్రీ యూనిట్లను ప్రోత్సహించారు. గాలికుంటు వ్యాధి నివారణకు జిల్లాలో 3.02 లక్షల పశువులకు ఉచిత వ్యాక్సినేషన్ పూర్తి చేశారు. మత్స్యకారుల సంక్షేమం కోసం పీఎంఎంఎస్‌వై కింద నిధులు విడుదల చేయడమే కాకుండా, ప్రమాదవశాత్తు మరణించిన మత్స్యకారుల కుటుంబాలకు రూ. 5 లక్షల చొప్పున గ్రూప్ ఇన్సూరెన్స్ పరిహారాన్ని అందించారు.

ఆరోగ్యం, విద్య రంగాల్లో విప్లవాత్మక మార్పులు

ప్రజలందరికీ నాణ్యమైన వైద్యం అందించాలన్న లక్ష్యంతో జననీ శిశు సురక్ష కార్యక్రమం కింద వేలాది మంది గర్భిణీలకు రక్షణ కల్పించారు. నాన్-కమ్యూనికేబుల్ వ్యాధుల స్క్రీనింగ్ కింద 8 లక్షల మందికి ఉచితంగా పరీక్షలు నిర్వహించడం గొప్ప విజయం. ఖమ్మం హెడ్‌క్వార్టర్స్‌లో రూ. 23.75 కోట్లతో 50 పడకల అత్యాధునిక క్రిటికల్ కేర్ బ్లాక్ నిర్మాణం శరవేగంగా సాగుతోంది. మధిర, సత్తుపల్లి, కల్లూరు ప్రాంతాల్లోని ఆసుపత్రులను అప్‌గ్రేడ్ చేస్తూ కోట్లాది రూపాయల నిధులతో నూతన భవనాలను అందుబాటులోకి తెచ్చారు.

పట్టణ ప్రగతి, గృహ నిర్మాణం, ఉపాధి కల్పన

సొంతింటి కల నెరవేర్చే పీఎం ఆవాస్ యోజన - అర్బన్ కింద మొదటి దశలో రూ. 127.33 కోట్లతో 2,762 ఇండ్ల నిర్మాణం పూర్తి చేసి, రెండో దశలో మరో 547 ఇండ్ల పనులను వేగవంతం చేశారు. యువతకు ఉపాధి కల్పనలో భాగంగా పీఎంఈజీపీ, పీఎం విశ్వకర్మ, పీఎంఎఫ్‌ఎంఈ పథకాల ద్వారా వందలాది మందికి భారీ సబ్సిడీతో కూడిన బ్యాంకు రుణాలు అందించి స్వయం ఉపాధికి బాటలు వేశారు. ఖమ్మం మున్సిపల్ కార్పొరేషన్ పరిధిలో అమృత్ స్కీమ్ ద్వారా పార్కుల అభివృద్ధి, వైరా, సత్తుపల్లి, మధిర మున్సిపాలిటీల్లో 15వ ఆర్థిక సంఘం నిధులతో సీసీ డ్రెయిన్లు, తాగునీటి ప్రాజెక్టులు, పబ్లిక్ టాయిలెట్ల నిర్మాణం పనులు రికార్డు స్థాయిలో పూర్తయ్యాయి. పీఎం సూర్య ఘర్ కింద కొణిజర్లను మోడల్ సోలార్ విలేజ్‌గా ఎంపిక చేసి గృహ వినియోగదారులకు భారీ సబ్సిడీలను అందిస్తున్నారు.

జాతీయ రహదారులు, రైల్వే నెట్‌వర్క్‌తో కనెక్టివిటీలో నవశకం

రవాణా రంగంలో జిల్లా దశ దిశలు మారుతున్నాయి. కోదాడ-ఖమ్మం, సూర్యాపేట-ఖమ్మం జాతీయ రహదారుల 4-లేన్ల పనులు వంద శాతం పూర్తయి ప్రజలకు అందుబాటులోకి వచ్చాయి. వేల కోట్ల రూపాయలతో ఖమ్మం-దేవరపల్లి, వరంగల్-ఖమ్మం-విజయవాడ గ్రీన్‌ఫీల్డ్ హైవేల నిర్మాణం శరవేగంగా జరుగుతోంది. ధంసలాపురం ఆర్‌ఓబీ నిర్మాణం తుది దశకు చేరుకుంది. దానికి తోడు పీఎంజీఎస్‌వై ద్వారా మారుమూల గ్రామాలకు సైతం వందల కోట్ల నిధులతో తారు రోడ్లు, ఉపాధి హామీ కింద 2,257 సీసీ రోడ్ల నిర్మాణం పూర్తయింది. అమృత్ భారత్ స్టేషన్ పనుల కింద ఖమ్మం, భద్రాచలం రైల్వే స్టేషన్లను ఆధునీకరిస్తున్నారు. డోర్నకల్ జంక్షన్ వరకు మూడో రైల్వే లైన్ పూర్తి కావడం, కొత్త లైన్ల కోసం భూసేకరణ వేగంగా జరగడం ఈ ప్రాంత అభివృద్ధికి కేంద్రం ఇస్తున్న ప్రాధాన్యతకు అద్దం పడుతోంది.

అభివృద్ధికి మారుపేరుగా మారిన మోదీ..

టెలికాం రంగంలో బీఎస్‌ఎన్‌ఎల్ ఆధ్వర్యంలో 175 హై-స్పీడ్ 4G టవర్ల ఏర్పాటు, వేలాది ఇళ్లకు బ్రాడ్‌బ్యాండ్ కనెక్షన్లతో డిజిటల్ విప్లవం కొనసాగుతోంది. మైనింగ్ ప్రభావిత ప్రాంతాల అభివృద్ధికి జిల్లా ఖనిజ ఫౌండేషన్ ద్వారా ఏకంగా రూ. 307 కోట్ల నిధులు క్రెడిట్ కావడం, అటవీశాఖలో కాంపా నిధులతో ప్లాంటేషన్ పనులు విజయవంతం కావడం జిల్లా పచ్చదనానికి, ప్రగతికి సాక్ష్యంగా నిలుస్తున్నాయి. అభివృద్ధికి మారుపేరుగా మారిన మోదీ ప్రభుత్వానికి ప్రజలు ఎల్లప్పుడూ అండగా ఉంటారని బీజేపీ నాయకులు ఈ సందర్భంగా ధీమా వ్యక్తం చేశారు. ఈ కార్యక్రమంలో బిజెపి రాష్ట్ర అధికార ప్రతినిధులు వాకధాని పుల్లారావు యాదవ్, నంబూరి రామలింగేశ్వర రావు, రాష్ట్ర కార్యవర్గ సభ్యులు రుద్ర ప్రదీప్ , గోంగూర వెంకటేశ్వర్లు, జిల్లా ప్రధాన కార్యదర్శులు గుత్తా వెంకటేశ్వరరావు, నల్లగట్టు ప్రవీణ్ కుమార్,జిల్లా ఉపాధ్యక్షులు నకిరేకంటి వీరభద్రం, రవి రాథోడ్ , బండారి నరేష్ కిసాన్ మోర్చా రవి గౌడ్, బోయినపల్లి సురేష్, కందుల శ్రీకృష్ణ తదితరులు పాల్గొన్నారు.