రౌడీ షీటర్లతో మొక్కలు నాటించిన పోలీసులు!
గంగాధర పోలీస్ స్టేషన్లో రౌడీ షీటర్లతో పోలీసులు మొక్కలు నాటించారు.
దిశ, గంగాధర: నేరాల నియంత్రణే కాదు.. నేరస్థుల్లో మానసిక పరివర్తన తీసుకురావడమే లక్ష్యంగా గంగాధర పోలీసులు ఒక సరికొత్త కార్యక్రమానికి శ్రీకారం చుట్టారు. మండల పోలీస్ స్టేషన్ ఆవరణలో బుధవారం రౌడీ షీటర్లతో మొక్కలు నాటించి, వారికి వినూత్న పద్ధతిలో కౌన్సిలింగ్ నిర్వహించారు. పర్యావరణ పరిరక్షణలో వారిని భాగస్వాములను చేస్తూ ఈ కార్యక్రమాన్ని చేపట్టడం స్థానికంగా చర్చనీయాంశమైంది.
పర్యావరణ పరిరక్షణలో భాగస్వాములుగా..
పోలీస్ స్టేషన్ పరిధిలోని రౌడీ షీటర్లందరినీ స్టేషన్కు పిలిపించిన పోలీసులు, వారితో కలిసి హరితహారంలో భాగంగా మొక్కలు నాటించారు. ఈ సందర్భంగా పౌర సమాజంలో బాధ్యతాయుతంగా ఎలా నడుచుకోవాలనే అంశంపై పోలీసు అధికారులు వారికి ప్రత్యేక అవగాహన కల్పించారు. గతాన్ని వీడి, గొడవలకు దూరంగా ఉంటూ కుటుంబాలతో ప్రశాంతమైన జీవితాన్ని గడపాలని సూచించారు.
మార్పు వస్తేనే షీట్ల రద్దు.. లేదంటే కఠిన చర్యలు!
ఈ సందర్భంగా రౌడీ షీటర్లకు పోలీసులు గట్టి హెచ్చరికలు జారీ చేశారు. "మీ ప్రవర్తనలో నిజాయితీతో కూడిన మార్పు వస్తే.. మీపై ఉన్న రౌడీ షీట్లను, పాత కేసులను చట్టపరంగా తొలగించేందుకు ఉన్నతాధికారులకు సిఫారసు చేసే అవకాశం ఉంటుంది. అలా కాకుండా సమాజంలో మళ్లీ శాంతిభద్రతలకు విఘాతం కలిగించాలని చూస్తే మాత్రం పీడీ యాక్ట్ వంటి కఠిన చట్టాల కింద జైలుకు పంపడం ఖాయం" అని స్పష్టం చేశారు. సత్ప్రవర్తనతో సమాజంలో మంచి గుర్తింపు తెచ్చుకోవాలని హితవు పలికారు.పోలీసులు అవలంబించిన ఈ వినూత్న కౌన్సిలింగ్ విధానం వల్ల రౌడీ షీటర్లలో కచ్చితంగా మార్పు వస్తుందని, వారు నేర ప్రవృత్తిని వీడి సాధారణ జీవితం వైపు అడుగులు వేస్తారని పోలీస్ శాఖ ఆశాభావం వ్యక్తం చేసింది. ఈ కార్యక్రమంలో గంగాధర పోలీస్ స్టేషన్ సిబ్బంది, కానిస్టేబుళ్లు, హోంగార్డులు పాల్గొన్నారు.
